Qostanaida Allur Campus atty zamanaýi turǵyn úi kesheni ashyldy. Ol avtomobil zaýytynyń qyzmetkerleri men óńirdiń jas mamandaryna arnalǵan, dep habarlaidy Dalanews.kz.
Jalpy aýmaǵy 13,5 myń sharshy metrden asatyn ǵimaratta shamamen 300 adam tura alady. Kampýsta 71 otbasylyq páter, 60 stýdenttik bólme jáne qonaqtardy ýaqytsha ornalastyrýǵa arnalǵan 20 bólme qarastyrylǵan. Ár blok jeke asúi jáne sanitarlyq torappen jabdyqtalǵan. Turǵyndardyń igiligine meditsinalyq pýnkt, kitaphana, kompiýter synyby, jattyǵý zaly jáne kir jýatyn oryn da ashylǵan.
Qurylysy 2023 jyly bastalǵan nysanǵa 2,1 mlrd teńgeden astam investitsiia salynǵan. Joba tolyqtai Allur kompaniiasynyń qarjysyna júzege asyryldy. Búginde kompaniia zaýytynda 3,5 myńnan astam adam eńbek etedi. Alǵashqy turǵyndar jańa kampýsqa 2025 jyldyń tamyzynda qonystandy.
"Biz jańa páterimizge jaiǵasyp aldyq. Munda bári bar – jaryq bólmeler, asúi, demalys oryndary. Bul bizdiń otbasymyz úshin úlken baqyt. Jumys ta, oqý da jaqyn, balalarǵa jaǵdai jasalǵan. Kompaniianyń bizge degen qamqorlyǵyn sezinemiz, bul biz úshin óte mańyzdy", – deidi alǵashqy qonystanýshylardyń biri Jomart Turmyshev.
Allur Campus avtomobil zaýytynyń dál qarsy betinde ornalasqan. Jaqyn mańda NISh mektebi, Muz aidyny, Oblystyq filarmoniia, Kostanay Plaza saýda ortalyǵy, "Tobyl Arena" sport kesheni jáne ózge de infraqurylym nysandary bar. Bul turǵyndarǵa jumys, oqý jáne demalysty qatar alyp júrýge qolaily jaǵdai jasaidy.
Joba Qostanaidyń indýstriialyq klasteriniń bir bóligi bolyp tabylady. Munda avtokomponentter óndirisimen qatar mamandardyń ómir súrýine jáne damýyna qajetti jaǵdailar jasalýda. Ekinshi kezeńde 260 oryndyq balabaqsha jáne sporttyq nysandar – fýtbol jáne basketbol alańdary, júgirý joldary, workout-aimaqtar men ústel tennisi alańdaryn salý josparlanǵan.
"Biz úshin óndiristi damytýmen qatar, osy óndiristiń artynda turǵan adamdarǵa qolaily jaǵdai jasaý da mańyzdy. Qyzmetkerlerimiz ben olardyń otbasylary qaýipsiz, zamanaýi ári yńǵaily ortada ómir súrgenin qalaimyz. Bul – Allur filosofiiasynyń bir bóligi: adamǵa qamqor bolý, jumys pen jeke ómir arasyndaǵy tepe-teńdikti saqtaý jáne óńirde jańa ómir sapasynyń standarttaryn qalyptastyrý", – dedi Allur avtomobil zaýytynyń atqarýshy direktory Arǵulan Maiqonov.
Osylaisha, Allur Campus jańa turǵyn úi kesheni ǵana emes, sonymen qatar kompaniianyń adami kapitaldy damytý jáne zamanaýi ómir súrý men jumys isteý jaǵdailaryn qurý strategiiasyn kórsetetin mańyzdy infraqurylymdyq nysanǵa ainaldy.
