Qostanaida dárigerdi urǵan naýqas sot aldynda jaýap berdi. Aiyptalýshy sot otyrysynda birden ókinetinin aityp, kinásin tolyq moiyndady, dep habarlaidy Dalanews.kz 31 arnaǵa silteme jasap.
Qostanailyq dáriger Anton Kistanovqa qol kótergen – onyń qurdasy, 34 jastaǵy Abylaihan Sárinjepov bolyp shyqty. Ol úilengen, úsh balasy bar, JShS-te júrgizýshi bolyp jumys isteidi. Aiyptalýshynyń sózinshe, búiregindegi tas saldarynan bolǵan qatty aýyrsyný, uzaq kútý jáne ýrologtyń dóreki sóilegeni ony qol kóterýge itermelegen.
“Ol maǵan: "Ne úshin Densaýlyq saqtaý ministrligine qońyraý shaldyń, saǵan ol ne beredi?" – dedi. Men: "Suraqtaryńdy keiin qoi, men myna aýyrsynýǵa shydamai turmyn" dedim. Týra ustamanyń aldynda turǵandai edim. Ol bolsa: "Sen ne, dálizde qoisha aiqailap, meni izdep júrsiń be?"– dedi. Sol sátte men shydai almai uryp jiberdim, ózim de qalai bolǵanyn túsinbei qaldym”, – dedi Sárinjepov sotta.
Buǵan deiin Abylaihan Sárinjepov jedel járdemmen aýrýhanaǵa jetkizilip, ýrolog em taǵaiyndap, aýyrsynýdy basqan bolatyn. Alaida jaǵdaiy qaitadan nasharlaǵan soń, dáriger qaita kelýge keńes bergen. Dáriger Anton Kistanov ol kúndi naqty esine saqtaitynyn, biraq qabyldaý bólimine túser sátten keiingi jaitty múlde umytqanyn aitty. Mi jaraqaty saldarynan onyń jady ǵana emes, densaýlyǵy da zardap shekken.
“Alda áli de kóptegen kútpegen saldar bolýy múmkin. Qan qysymynyń kóterilýi, epilepsiialyq ustamalar, kista paida bolýy jáne taǵysyn taǵy. Neirohirýrgtar jarty jylǵa deiin, tipti odan da uzaq ýaqyt boiy gematoma taralmaýy yqtimal deidi”, – dedi zardap shekken dáriger Anton Kistanov.
Aiyptalýshynyń buǵan deiin de qylmystyq jaýapkershilikke tartylǵany belgili boldy: ol tonaý isi boiynsha shartty jaza alǵan, sondai-aq júrgizýshi kýáliginsiz kólik tizgindegeni úshin qoǵamdyq jumystarǵa tartylǵan. Endi ol abaisyzda adam densaýlyǵyna aýyr ziian keltirgeni úshin eń kóp degende 1 jylǵa bas bostandyǵynan aiyrylýy múmkin.
