Qostanai oblysynyń Qarabalyq aýdanyndaǵy Qarabalyq aýylynda bloger Mirshat Sársenbaev 15 million teńge bopsalady degen kúdikpen ustaldy, dep habarlaidy Dalanews.kz.
HALYQSTAN Telegram-arnasynyń málimetinshe, jábirlenýshi – jergilikti qus fabrikasyn qaita jandandyrý jobasymen ainalysatyn Poultry Agro kompaniiasynyń ókili.
Sársenbaev internetke alty beinerolik jariialap, onda atalǵan kompaniianyń jer telimderin zańsyz paidalanyp otyrǵanyn málimdegen. Sondai-aq, ol kásiporyn aýmaǵynan shyǵarylǵan qoqys úiindileri men fabrika traktorynyń qoqysqa tiri jáne óli taýyqtardy aparyp tógip jatqanyn túsirgen.
“Iaǵni, bul jerde qustardy tiridei joiý faktisi anyq baiqalady. Bul – janýarlarǵa qatygezdik tanytýǵa tyiym salatyn zańdy óreskel buzý”, – delingen habarlamada.
Bloger qus fabrikasyn tekserip, kinálilerdi jaýapqa tartýdy talap etken. Alaida, kóp uzamai onyń ózi 15 million teńge bopsalaý isi boiynsha aiyptalyp, qamaýǵa alynǵan.
“Bizdiń derekkózderimizge súiensek, Sársenbaevtyń kóligi men úiine tintý júrgizilgenimen, odan aiǵaq zattar tabylmaǵan. Al aqshanyń qaida ekenin blogerdiń ózi aitqan. Onyń jaqtastary men keibir zańgerler áleýmettik jelilerde bul tergeýde birqatar zańbuzýshylyqtar oryn alǵanyn málimdep otyr. Atap aitqanda, Sársenbaevqa kúdikti mártebesi týraly der kezinde habar berilmegen, ony áýelde qorǵaýǵa quqyǵy bar kýáger retinde ǵana tergegen”, – delingen aqparatta.
Eske sala keteiik, osyǵan deiin Almatyda kásipker men eki bloger bopsalaý jáne áleýmettik jelide kompromat jariialaimyn dep qorqytý faktisi boiynsha ustalǵan edi. Olardan 8 million teńge talap etilgeni habarlanǵan.
