Qostanai oblysynda áleýmettik infraqurylym qarqyndy damýda. Bul týraly óńir basshysy Qumar Aqsaqalov Qostanai oblysynyń áleýmettik-ekonomikalyq damýy týraly ótkizgen brifingi ýaqytynda atap ótti, dep habarlaidy Dalanews.kz.
Qostanai oblysynda jańa bilim berý nysandaryn salý arqyly óńirdiń áleýmettik salasyn nyǵaitý jumystary júieli túrde júrgizilýde. 2024 jyly Zatobol kentinde 900 oryndyq, Arqalyq qalasynda 300 oryndyq eki zamanaýi mektep paidalanýǵa berildi. Sonymen qatar 747 orynǵa 5 balabaqsha salynýy mektepke deiingi uiymdarǵa túsetin júktemeni edáýir azaitty.
Aǵymdaǵy jyly jalpy syiymdylyǵy 5 myńǵa jýyq oryn bolatyn taǵy 6 mektep ashyldy. Olar Qostanai qalasynyń «Bereke» jáne «Áýejai» shaǵyn aýdandarynda, Arqalyq qalasynda, Qostanai aýdanynyń Zarechnoe jáne Eńbek aýyldarynda, Áýliekól aýdanynyń Qushmuryn kentinde, Jangeldin aýdanynyń Qolqamys aýylynda jáne Rýdnyi qalasynda ornalasqan. Jyl sońyna deiin 2,8 myń oryndyq taǵy 3 mektepti paidalanýǵa berý josparlanyp otyr.
Sońǵy úsh jylda óńirde 4 960 orynǵa 8 mektep jáne 2 242 oryndyq 14 balabaqsha ashyldy. Bul mektepke deiingi tárbiemen qamtýdy edáýir arttyrýǵa múmkindik berdi: 2–6 jas aralyǵyndaǵy balalardy qamtý deńgeii 96,4 paiyzǵa, al 3–6 jas aralyǵy boiynsha 100 paiyzǵa jetti.
Balalardyń shyǵarmashylyq jáne tehnikalyq qabiletterin damytý maqsatynda zamanaýi ortalyqtar da ashylýda. Atap aitqanda, Qostanai qalasynda SMART «IQostanay» ortalyǵy, Tobyl qalasynda «Balalar álemi» balalar shyǵarmashylyq ortalyǵy jumys isteidi. Al Jangeldin aýdanynyń Torǵai aýylynda «Jas órken» shyǵarmashylyq úiin qaita jańǵyrtý jumystary aiaqtalýǵa jaqyn, nysandy 2026 jyldyń basynda ashý josparlanǵan.
Aldaǵy ýaqytta oblystyń barlyq óńirlerinde injeneriia, robototehnika, kibersport, aviamodeldeý jáne baǵdarlamalaý sekildi zamanaýi baǵyttardy qamtityn osyndai ortalyqtardy ashý kózdelip otyr. Bul balalardyń turǵylyqty jerine qaramastan teń múmkindikterge ie bolýyna jaǵdai jasaidy.
