Qazaqstannyń avtomobil ónerkásibi rekord jańartty. 2025 jyldyń qarasha aiynda 25,8 myń jeńil avtokólik satylyp, joǵary kórsetkishke jetti, dep habarlaidy Dalanews.kz.
Onyń 7,8 myń danasy — Qostanaida qurastyrylǵan Chevrolet markaly avtomobilderi. Odan keiingi oryndarda Hyundai (5,3 myń) jáne Kia (2 myń) avtokólikteri tur.
Jalpy, 2025 jyldyń qańtar–qarasha ailary aralyǵynda jeńil avtokólik satylymy 207,6 myńǵa jetti, bul 2024 jyldyń osy kezeńimen salystyrǵanda 15,6% kóp. Budan da mańyzdysy — 11 aida satylǵan jeńil avtokóliktiń kólemi búkil 2024 jyldyń rekordtyq kórsetkishinen 1,2%-ǵa artyq boldy. Osylaisha, byltyrǵy rekord jańartyldy.
Otandyq avtozaýyttar 2025 jyldyń qańtar–qarasha ailarynda konveierden 146,2 myń birlik avtokólik tehnikasyn shyǵardy, onyń 132,7 myńy — jeńil avtomobilder.
Sektor boiynsha kóshbasshy — Qostanai oblysyndaǵy Allur kompaniiasy: 11 aida 79,2 myń birlik ónim shyǵaryp, eldegi jalpy óndiristiń 54,2%-yn qurady.
Odan keiin Almatydaǵy Hyundai Trans Kazakhstan jáne Hyundai Trans Almaty kásiporyndary — 48,5 myń birlik. Sondai-aq avtokólik tehnikasynyń eleýli kólemi Shyǵys Qazaqstandaǵy «SemAZ» jáne Daewoo Bus Kazakhstan (3,7 myń birlik), Qaraǵandy oblysyndaǵy QazTehna (2,1 myń birlik) jáne Aqmola oblysyndaǵy «KAMAZ-Injiniring» (1,1 myń birlik) óndiristerine tiesili.
2025 jyldyń qarasha aiynda avtomobilder, tirkemeler jáne jartylai tirkemeler óndirisiniń quny 311 mlrd teńgeni qurady, al qańtar–qarasha kezeńindegi kólem 2 trln teńgeden asty. Bul — 2024 jyldyń sáikes kezeńimen salystyrǵanda aqshalai mánde 25,4%-ǵa kóp (NÓS — 115,2%). Óndiristiń ósýi avtopromnyń el indýstriiasyndaǵy rólin kúsheitti: avtokólik ónerkásibi mashina jasaýdyń 41,7%-yn qurady jáne saladaǵy negizgi segment mártebesin nyǵaitty.
Sonymen qatar avtomobilder, tirkemeler jáne jartylai tirkemeler óndirisiniń úlesi óńdeý ónerkásibinde 7,5%-ǵa, jalpy ónerkásip qurylymynda 3,7%-ǵa jetti. Bul óndiris ósiminiń joǵary qosylǵan qunǵa ie mashina jasaý jáne qurastyrý sektoryna qarai yǵysa túskenin kórsetedi.
Avtokólik ónerkásibiniń damýyna negizgi úlesti óndiristik qýattary shoǵyrlanǵan Qostanai oblysy (Allur) qosty. Óńirge avtomobilder, tirkemeler jáne jartylai tirkemeler óndirisiniń jalpy kóleminiń jartysyna jýyǵy tiesili. Avtoprom oblystyń ónerkásip qurylymynda basym orynǵa ie: onyń úlesi mashina jasaýda — 81,6%, óńdeý ónerkásibinde — 45,4%, al jalpy ónerkásipte — shamamen úshten birin quraidy. Bul salanyń Qostanai oblysynyń negizgi indýstriialyq draiveri ekenin aiǵaqtaidy.
Almaty qalasynda da avtoprom ónerkásip qurylymynda mańyzdy oryn alady. Munda avtomobil ónerkásibiniń úlesi qaladaǵy mashina jasaýdyń 80,3%-yn, óńdeý ónerkásibiniń 37,6%-yn jáne jalpy ónerkásiptiń 32%-yn qurady. Bul megapolistegi avtosalalyq óndiristerdiń joǵary shoǵyrlanǵanyn kórsetedi.
Alaida jalpyulttyq deńgeide avtomobil jasaý segmentinde Qostanai oblysy aiqyn erekshelenedi. Óńirdiń avtopromy Qazaqstandaǵy búkil mashina jasaýdyń 20,5%-yna, óńdeý ónerkásibiniń 3,7%-yna jáne el ónerkásibiniń jalpy kóleminiń shamamen 2%-yna úles qosty. Salystyrý úshin: qalǵan barlyq óńirlerdiń jiyntyq úlesi mashina jasaýda — 21,2%, óńdeý ónerkásibinde — 3,8%, ónerkásipte — 1,9%.
Jalaqy dinamikasy avtopromnyń ekonomikalyq róliniń ózgerisin de kórsetip otyr. 2015 jyly avtomobil ónerkásibindegi ortasha ailyq jalaqy respýblikalyq deńgeiden nebári 5,3%-ǵa joǵary boldy. Al 2024 jyldyń qorytyndysy boiynsha aiyrmashylyq edáýir ulǵaidy: saladǵy ortasha jalaqy el boiynsha ortasha kórsetkishten shamamen 1,5 ese kóp — 579 myń jáne 384,3 myń teńge.
Qazaqstannyń negizgi avtomobil klasteri sanalatyn Qostanai oblysynda 2015 jyly avtopromdaǵy ortasha jalaqy óńirlik deńgeiden 0,3%-ǵa tómen bolsa, 2024 jyly kerisinshe 29,1%-ǵa, iaǵni 90,9 myń teńgege joǵary boldy: tiisinshe 402,9 myń jáne 312 myń teńge.
- shaǵyn kásiporyndardy qosa eseptegende
Qostanai oblysyndaǵy avtomobil ónerkásibiniń damýy óńirdiń ekonomikalyq belsendiligin aitarlyqtai arttyryp otyr: sala ónerkásip óndirisiniń mańyzdy bóligin qalyptastyryp qana qoimai, qyzmetkerlerdiń kiristerin ósirý arqyly óńirlik qurylymdy jáne qosylǵan qundy nyǵaitady. Avtoprom — óńir ekonomikasynyń negizgi lokomotivi ári salalyq shoǵyrlaný ónimdilik ósimine jáne jalpyulttyq ekonomikaǵa qalai áser etetininiń aiqyn úlgisi.
