Ákimdik qalanyń Ortalyq saiabaǵynda Pýtinniń kelýin quptamaityn piket ótkizýdi josparlaǵan Ánelge san túrli syltaý aityp, qarsylyq aktsiiasyn ótkizýge ruqsat bermegen.
Qoǵam belsendisi buǵan deiin oblys ákimi Qumar Aqsaqalovtyń atyna eki ret hat joldap, piket ótkizýge ruqsat berýdi talap etken. Alaida ákimdik eki rette de úzildi-kesilde bas tartypty. Áneldiń sotqa júginýden ózge amaly qalmaǵan.
Jańa Qazaqstanda qoǵam belsendileriniń jappai qýdalanyp jatqanyna alańdaǵan Ánel alǵashqy ótinishti 7 mamyrda joldaǵan eken. Alaida Qumar Aqsaqalovtyń keńsesi onyń aktsiiasyn áleýmettik mańyzdy máselelerdiń sanatyna qospai, keri ysyra salǵan.
Keiinnen Resei prezidentiniń saparyna qarsylyq bildirip, bir kisilik piket ótkizý úshin taǵy da ákimdiktiń tabaldyryǵyn tozdyrǵan. Belsendi bógde eldiń prezidentine bola qyrýar qarjyny tógip-shashyp, qyp-qyzyl shyǵynǵa batqaly otyrǵan Qostanai ákimdiginiń sheshimin quptamaidy.
Aita ketelik, Pýtinniń kelýine daiyndalyp jatqan Qostanai ákimdigi qalany kóriktendirýge 10 mlrd teńge jumsamaq. Óńir basshylyǵy Qazaqstan-Resei aimaqaralyq forýmyn ótkizýge daiyndalyp jatyr.
Aqparatqa qaraǵanda, atalǵan soma qalada Smart-ortalyq salyp, Tobyl saiabaǵynyń soltústik bóligin qaita jóndeýge jumsalmaq. Buǵan qosa, qarjy qala kóshelerin jaryqtandyrýǵa, aialdama pavilondaryn ornatýǵa, kóshelerdi abattandyrýǵa, sýburqaqty jóndeýge, 13 000 sharshy metr jerdiń kirpishin almastyrýǵa, jol men úilerdi jóndeýge de jumsalady.
Qoǵam belsendisiniń atap ótkenindei, ótetin de ketetin forýmǵa bola shamadan tys shyǵyndanýdyń qajeti joq.
"Osy pikirimdi elge jetkizý úshin bir kisilik piket ótkizýdi josparlaǵan edim. Ákimdik bul joly da túrli syltaý aityp, esikten shyǵaryp saldy. Pýtinniń kelýine qarsy aktsiia ótkizetinimdi esteginde ákimdik qyzmetkerlerinde záre qalmady. Maǵan birinen keiin biri qońyraý shalyp, qoqan-loqy kórsete bastady. Bul áreketimdi toqtatpasam, muny sońy jaqsylyqqa ákelmeidi dep eskertti. Men qyzmet isteitin oqý ornynyń basshylyǵyna habarlasyp, qysym kórsetti. Ýniversitettegiler belsendilikpen oqýdy aiaqtaǵannan keiin ainalysýǵa keńes berdi", - dep jazdy Ánel Áliǵazina.
Belsendiniń Pýtinge qarsy piket ótkizýine ruqsat bermegen Qostanai ákimdigi "mundai aktsiianyń áleýmettik mańyzy shamaly" degen ýáj aitqan. Kreml kóseminiń sapary qarsańynda biýdjetten bólinetin milliardtar buǵan deiin josparlanyp qoidy dep aqtalǵan.
Pýtinniń Qazaqstanǵa sapary Reseidiń Ýkrainaǵa basyp kirýine bailanysty Máskeý halyqaralyq qaýymdastyqtan oqshaýlanǵan shaqta josparlanyp otyr. Máskeý Ýkrainaǵa qarsy soǵys bastaǵannan keiin álem liderleri aldynda Resei prezidenti Vladimir Pýtin men syrtqy ister ministri Sergei Lavrovtyń súikimi ketken. Batys elderi Pýtin men onyń tóńiregindegi adamdarǵa qarsy derbes sanktsiialar salǵan. Álem liderleri bas qosatyn sammitterge Reseidi shaqyrmaityn bolǵan.
