Qostanai qalasyndaǵy kópqabatty turǵyn úi qurylysy júrip jatqan nysanda 11 sheteldik azamattyń zańsyz eńbek etip júrgeni anyqtaldy, dep habarlaidy dalanews.kz.
Kóshi-qon qyzmeti politsiiasynyń málimetinshe, ustalǵandar – kórshiles memleketterdiń azamattary. Olar qurylys alańynda jumys istegenimen, resmi qujattarda qazaqstandyqtardyń jeke sharýashylyqtarynda eńbek etetin qyzmetkerler retinde tirkelgen.
Zańsyz eńbek qyzmetimen ainalysqany anyqtalǵan sheteldikterge qatysty ákimshilik materialdar rásimdelip, isteri sotqa joldandy. Eger olardyń kinási dáleldense, aiyppul salý nemese Qazaqstan aýmaǵynan shyǵaryp jiberý túrindegi jaza qoldanylýy múmkin.
Atalǵan derekter politsiianyń «Nelegal» jedel-profilaktikalyq is-sharasy barysynda anyqtalǵan. Sonymen qatar reid kezinde elden ketý týraly sot sheshimin oryndamai, jasyryn júrgen 28 jastaǵy sheteldik azamat ta qolǵa tústi.
Sot sheshimimen oǵan 30 táýlikke deiin júrip-turý erkindigin shekteý sharasy qoldanylyp, Qazaqstannan májbúrli túrde shyǵarý týraly qaýly qabyldandy. Quzyrly organdar onyń el aýmaǵynan shyǵýyn baqylaýǵa aldy.
Jalpy, biyl Qostanai oblysynda kóshi-qon zańnamasyn buzýdyń 170 deregi tirkelgen.
