Qostanai oblysynyń Beiimbet Mailin aýdanynda onnan astam ónerkásiptik kásiporyn jyldar boiy sanitarlyq-qorǵaý aimaqtarynsyz jumys istegeni anyqtaldy, dep habarlaidy dalanews.kz.
Aýdan prokýratýrasy júrgizgen taldaý barysynda epidemiialyq mańyzy joǵary 11 nysanda óreskel zańbuzýshylyqtar anyqtalǵan. Olardyń qatarynda asfaltbeton zaýyty, iri elevatorlar jáne birqatar jer qoinaýyn paidalanýshy kásiporyndar bar.
Prokýratýra málimetinshe, bul kásiporyndar sanitarlyq-qorǵaý aimaqtaryn belgilemei jáne sanitarlyq-epidemiologiialyq qorytyndy almai qyzmetin jalǵastyryp kelgen.
Sanitarlyq-qorǵaý aimaǵy óndiristik nysandardy turǵyn úilerden bólip, ziiandy faktorlardyń adam densaýlyǵy men qorshaǵan ortaǵa áserin azaitý úshin qajet.
Qadaǵalaý organy mundai aimaqtardyń bolmaýy turǵyndardyń densaýlyǵy men ekologiiasyna tikelei qaýip tóndiretinin atap ótti.
Prokýror qaýlylary negizinde barlyq kásiporyn ákimshilik jaýapkershilikke tartyldy. Jalpy kólemi 6,3 mln teńge aiyppul salynǵan.
Prokýratýra aralasqannan keiin kásiporyndar sanitarlyq-qorǵaý aimaqtaryn rásimdeý jáne qajetti qujattardy alý jumystaryn bastaǵan. Al sanitarlyq-epidemiologiialyq baqylaý qyzmeti zańbuzýshylyqtar tolyq joiylǵanǵa deiin shekteý sharalaryn engizgen.
Sonymen qatar tiisti baqylaýdy ýaqytynda júrgizbegeni úshin aýdandyq sanitarlyq-epidemiologiialyq baqylaý bóliminiń basshysy tártiptik jaýapkershilikke tartyldy.
