Qostanai qalasynda poiyz vagonyna shyǵyp sýretke túspek bolǵan jasóspirim joǵary kerneýli toqqa túsip, aýyr jaraqat aldy. Osy oqiǵadan keiin onyń zańdy qamqorshysy kámeletke tolmaǵan balanyń qaýipsizdigin qamtamasyz etpegeni úshin ákimshilik jaýapkershilikke tartyldy, dep habarlaidy dalanews.kz.
Qostanai oblysynyń kámeletke tolmaǵandardyń isteri jónindegi mamandandyrylǵan aýdanaralyq soty QR Ákimshilik quqyq buzýshylyq týraly kodeksiniń 127-babynyń 1-bóligi boiynsha azamat B.-ǵa qatysty isti qarady. Sot materialdaryna sáikes, 2010 jyly týǵan jasóspirimniń qamqorshysy bolyp tabylatyn azamat B. balanyń tárbiesi men qaýipsizdigin tiisti deńgeide qamtamasyz etpegen.
2026 jylǵy 25 maýsym kúni keshki saǵat 21:00 shamasynda jasóspirim Qostanai stantsiiasyndaǵy Ońtústik temirjol parkiniń aýmaǵynda bolǵan. Is materialdaryna sáikes, ol sýretke túsý maqsatynda bailanys jelisiniń astynda turǵan poiyz vagonynyń tóbesine shyqqan. Sol sátte joǵary kerneýli elektr togyna túsip, aýyr jaraqat alǵan.
Dárigerler baladan denesiniń 60 paiyzyn qamtyǵan III dárejeli kúiikten bolǵan shokty, sondai-aq murny men tiliniń soǵylyp jaraqattanǵanyn anyqtaǵan.
Sot otyrysynda azamat B. óz kinásin tolyq moiyndady. Onyń aitýynsha, jasóspirimniń anasy qaitys bolǵannan keiin jienine zańdy qamqorshy bolǵan. Sot ony ákimshilik quqyq buzýshylyq jasaǵany úshin kináli dep tanyp, 43 250 teńge kóleminde aiyppul saldy. Aita keteiik, sot qaýlysy ázirge zańdy kúshine engen joq.
