Qostanai oblysynda jyl basynan beri zańsyz ainalymnan 230 keli esirtki tárkilenip, 180 esirtki saity men 100 graffiti-jazý joiyldy, dep habarlaidy dalanews.kz.
Prokýratýra málimetinshe, esirtki qylmystaryna qarsy kúres aiasynda 2,9 myń bank shoty buǵattalǵan. Sonymen qatar, sot sheshimimen ekinshi deńgeili bankterdegi jalpy somasy 194 mln teńge bolatyn qarajatqa tyiym salyndy.
Jyl basynan beri óńirde esirtki qylmystaryna qatysy bar 33 adam qylmystyq jaýapkershilikke tartylǵan. Onyń ishinde 13 adam esirtki ótkizgeni úshin, al eki adam esirtkini jarnamalaǵany úshin jaýapqa tartyldy.
Atap aitqanda, 20 sáýirde Jitiqara qalasynyń turǵyny internet arqyly esirtki zattaryn jarnamalap, ótkizgeni úshin kináli dep tanylyp, jeti jylǵa bas bostandyǵynan aiyryldy. Úkim zańdy kúshine engen.
Tergeý barysynda sottalǵan áieldiń Telegram messendjeri arqyly jumys isteitin internet-dúken qyzmetine qatysqany anyqtalǵan. Ol SMM-menedjer retinde Telegram, TikTok jáne Instagram áleýmettik jelilerinde esirtki taratýshylardy tartýǵa baǵyttalǵan jarnamalyq habarlamalardy júieli túrde jariialap otyrǵan.
Tintý kezinde onyń turǵylyqty jerinen 790 gramnan astam sintetikalyq esirtki tárkilendi.
Quqyq qorǵaý, arnaiy jáne jergilikti atqarýshy organdardyń birlesken jumysynyń nátijesinde óńirdegi esirtki qylmystarynyń sany 213-ten 134-ke deiin, iaǵni 37 paiyzǵa tómendegen.
Sonyń ishinde esirtki saqtaý faktileri 101-den 61-ge deiin, al esirtki ótkizý faktileri 69-dan 41-ge deiin azaiǵan.
Prokýratýra málimetinshe, óńirde nashaqorlyq pen esirtkiniń zańsyz ainalymyna qarsy júieli jumystar jalǵasyp jatyr.
