Aqmola oblysynyń Qosshy qalasynda Nura–Esil kanalynda 10 jastaǵy bala sýǵa batyp ketti. Qazirgi ýaqytta oqiǵa ornynda súńgýirler men tótenshe jaǵdailar qyzmetiniń mamandary jumys júrgizip jatyr, dep habarlaidy dalanews.kz.
Qaiǵyly jaǵdai jergilikti turǵyndar jii demalatyn kanal ýchaskesinde bolǵan. Aptap ystyq kúnderi bul aýmaqqa adamdar kóp jinalǵanymen, munda sýǵa túsýge resmi túrde tyiym salynǵan.
Nura–Esil kanaly strategiialyq gidrotehnikalyq nysan bolyp sanalady jáne tehnikalyq sýmen jabdyqtaý, aýyl sharýashylyǵy alqaptaryn sýarý men Esil ózeniniń sý rejimin retteý úshin paidalanylady. Sondyqtan kanal sýy shomylýǵa arnalmaǵan. Bul týraly arnaiy eskertý belgileri de ornatylǵan.
Soǵan qaramastan turǵyndar qaýipsizdik talaptaryn jii elemeidi. Mamandardyń aitýynsha, kanaldyń betki qabaty tynysh kóringenimen, ol óte qaýipti. Nysannyń eni shamamen 19 metrge jetse, kei jerleriniń tereńdigi 3 metrge deiin barady.
Qutqarýshylar ata-analardy balalardy qaraýsyz qaldyrmaýǵa jáne sýǵa túsýge tyiym salynǵan oryndarda demalýdan bas tartýǵa shaqyrady.
Oqiǵanyń mán-jaiy anyqtalyp jatyr.
