Qosshylyqtar úshin negizgi máselelerdiń biri – qarapaiym ǵana qoqys salatyn konteinerlerdiń jetispeýi.
– Ortalyq alleia kópten beri qoqys tógetin alańǵa ainalyp ketti. Al munda balalar oinaidy, jaǵymsyz iis páterlerdi alyp ketedi. Biz PIK-ke talai ret habarlastyq, olar bizdi ákimdikke, al ákimdik keri siltep, sarsańǵa tústik, – deidi jergilikti turǵyn Ásem Eslambekqyzy.
Qosshy qalasy ákiminiń orynbasary Álihan Qýatbekovtyń aitýynsha, qoqysty shyǵarý turaqty túrde júrgiziledi, tek biyldyń ózinde 4 ruqsat etilmegen qoqys tógetin oryn joiylǵan, 4 myń sharshy metrden astam qoqys shyǵarylǵan.
– Máseleni tolyq sheshý úshin qarjylandyrý jetispeidi, qazir merdiger uiymmen jalpy somasy 6,5 mln teńgege shart bar, biz qarjylandyrý kólemin ulǵaityp, búkil qala aýmaǵynda sanitarlyq jaǵdaidy jaqsartýdy josparlap otyrmyz, – dedi Álihan Qýatbekov.
Qoǵamdyq kóliktiń jumysy da azamattardyń kóńilin kónshitpei otyr. Kólik sany múldem jetispeidi.
– Negizinen turǵyndardyń barlyǵy derlik Nur-Sultan qalasyna jumysqa barady. Kúnde avtobýstardar lyq toly bolady. Adamdar kóp júretin qarbalas kezdi aitpai-aq qoiaiyn. Júrgizýshilerge obal. Ásirese, tańǵy jáne keshki ýaqyttarda avtobýstardyń qatynaý jiiligin arttyrý qajet, – deidi jergilikti turǵyn Raihangúl Aqbergenova.
Taǵy bir ózekti másele – mektepterdegi oryn sany. Biyl Qosshy qalasyndaǵy № 2 orta mektepke birden 600 bala barǵany belgili, al birinshi synyptar sany 1 «Y» synypqa deiin jetken.
– Oqý jylynyń sońyna deiin eki aýysymdyq 1200 oryndyq jańa mektepti paidalanýǵa berý josparlanýda. Al kelesi jyly taǵy bir jańa mektep beriledi, ol da 1200 oqýshyǵa arnalǵan. Budan bólek, «Nur Otan» partiiasynyń sailaýaldy ýádeleri aiasynda atalǵan qalada 2023 jylǵa deiin taǵy da birneshe mektep salý josparlanýda, – dedi Qosshy ákiminiń orynbasary Bergen Jumkei.
Kóshpeli májilis barysynda turǵyndar sýmen qamtý máselesin de qozǵady. Kóptegen páterlerde sýdyń aryny álsiz, sondyqtan kóbinese aldyn ala sý jinap alýǵa týra keledi. Sýdy úzdiksiz berý úshin bileýshi partiianyń sailaýaldy baǵdarlamasy aiasynda Aqmola oblysynyń Tselinograd aýdany boiynsha 118 km injenerlik jeli tartý josparlanǵan, ol 3,5 myńnan astam turǵyn úidi qamtýǵa múmkindik beredi.
– Qalamyzda sýdy paidalanýshylardyń 70% – «Lesnaia poliana» jáne «Nurai TK turǵyn úi alabynyń turǵyndary. Atalǵan úilerdiń turǵyndaryn úzdiksiz sýmen qamtamasyz etý, sondai-aq Qosshyny rezervtik sýmen qamtý úshin Qarajar aýylynan Qosshy qalasyna deiin sýtartqysh salý josparlanýda. Ony salýdy kelesi jyly bastaý kózdelýde, – dedi Bergen Jumkei.
