Kásipker Almas Abdyǵapparovtyń anasy Esentai City keshenindegi páterlermen bailanysty alaiaqtyqqa Qospaevtyń uiymdasqan qylmystyq tobynyń qatysy bar dep málimdedi, dep habarlaidy Dalanews.kz.
AV-Construction kompaniiasynyń direktory jáne kásipker Almas Abdyǵapparovtyń anasy Sáýle Júnisbekova BES.media bas redaktory Serikjan Máýletbaiǵa bergen suhbatynda ózi basqaratyn kompaniianyń jyljymaityn múlik jobasyna jasalǵan reiderlik shabýyl, uzaqqa sozylǵan qylmystyq qýdalaý jáne Esentai City jobasynyń kúireýi týraly aitty.
Sáýle Júnisbekova aitqan epizodtardyń biri – Olga Abdyǵapparovaǵa taǵylǵan 21 páterdi urlaý áreketi týraly aiyp. Bul páterler AV-Construction kompaniiasyna tiesili bolǵan.
Júnisbekovanyń sózinshe, bastapqyda tergeý Olga Abdyǵapparovany 21 páterdi iemdenýge áreket jasady dep aiyptaǵan. Bul páterler atyshýly qylmys áleminiń ókili Eldos Qospaevtyń júrgizýshisi – Májitovtiń atyna aldyn ala satý-satyp alý kelisimsharty arqyly rásimdelgen. Eldos Qospaev Bolat Nazarbaevtyń "oń qoly" retinde belgili.
Alaida, Júnisbekova málim etkendei, páterlerge aqsha tólegen Májitov emes, zańsyz alkogol saýdasyna qatysy bar uiymdasqan top múshesi Aleksei Kýznetsov bolǵan. Ol 2023 jyldyń 1 naýryzynda Soltústik Kiprden Qazaqstanǵa ekstraditsiialanǵan.
Sondai-aq, ol "135-is" (Qospaevtyń OPG-si boiynsha is) aiasynda sot bul páterler zańsyz aldyn ala kelisimshart arqyly rásimdelgenin jáne qarjy kóleńkeli ainalymnan kelgenin moiyndaǵanyn jetkizdi.
Júnisbekovanyń aitýynsha, tergeý barysynda Májitov óz advokatynyń kómegimen mámilege qatysy joq ekenin alǵa tartyp, kelisimshartty buzý týraly talap qoiǵan. Kelisimder buzylǵan soń, páterler AV-Construction kompaniiasynyń balansynda qalǵan.
Soǵan qaramastan, Olga Abdyǵapparovaǵa osy múlikti urlamaq boldy degen aiyp taǵylyp otyr.
Almatydaǵy Esentai City jobasyn qolǵa alǵan AV-Construction kompaniiasy sońǵy jyldary birqatar daýly qylmystyq iske ilikken. Sáýle Júnisbekova muny bizneske jasalǵan reiderlik qysym dep baǵalaidy.
