كاسىپكەر الماس ابدىعاپپاروۆتىڭ اناسى Esentai City كەشەنىندەگى پاتەرلەرمەن بايلانىستى الاياقتىققا قوسپايەۆتىڭ ۇيىمداسقان قىلمىستىق توبىنىڭ قاتىسى بار دەپ مالىمدەدى، دەپ حابارلايدى Dalanews.kz.
AV-Construction كومپانياسىنىڭ ديرەكتورى جانە كاسىپكەر الماس ابدىعاپپاروۆتىڭ اناسى ساۋلە جۇنىسبەكوۆا BES.media باس رەداكتورى سەرىكجان ماۋلەتبايعا بەرگەن سۇحباتىندا ءوزى باسقاراتىن كومپانيانىڭ جىلجىمايتىن مۇلىك جوباسىنا جاسالعان رەيدەرلىك شابۋىل، ۇزاققا سوزىلعان قىلمىستىق قۋدالاۋ جانە Esentai City جوباسىنىڭ كۇيرەۋى تۋرالى ايتتى.
ساۋلە جۇنىسبەكوۆا ايتقان ەپيزودتاردىڭ ءبىرى – ولگا ابدىعاپپاروۆاعا تاعىلعان 21 پاتەردى ۇرلاۋ ارەكەتى تۋرالى ايىپ. بۇل پاتەرلەر AV-Construction كومپانياسىنا تيەسىلى بولعان.
جۇنىسبەكوۆانىڭ سوزىنشە، باستاپقىدا تەرگەۋ ولگا ابدىعاپپاروۆانى 21 پاتەردى يەمدەنۋگە ارەكەت جاسادى دەپ ايىپتاعان. بۇل پاتەرلەر اتىشۋلى قىلمىس الەمىنىڭ وكىلى ەلدوس قوسپايەۆتىڭ جۇرگىزۋشىسى – ءماجىتوۆتىڭ اتىنا الدىن الا ساتۋ-ساتىپ الۋ كەلىسىمشارتى ارقىلى راسىمدەلگەن. ەلدوس قوسپايەۆ بولات نازاربايەۆتىڭ "وڭ قولى" رەتىندە بەلگىلى.
الايدا، جۇنىسبەكوۆا ءمالىم ەتكەندەي، پاتەرلەرگە اقشا تولەگەن ءماجىتوۆ ەمەس، زاڭسىز الكوگول ساۋداسىنا قاتىسى بار ۇيىمداسقان توپ مۇشەسى الەكسەي كۋزنەسوۆ بولعان. ول 2023 جىلدىڭ 1 ناۋرىزىندا سولتۇستىك كيپردەن قازاقستانعا ەكستراديسيالانعان.
سونداي-اق، ول "135ء-ىس" (قوسپايەۆتىڭ وپگ-سى بويىنشا ءىس) اياسىندا سوت بۇل پاتەرلەر زاڭسىز الدىن الا كەلىسىمشارت ارقىلى راسىمدەلگەنىن جانە قارجى كولەڭكەلى اينالىمنان كەلگەنىن مويىنداعانىن جەتكىزدى.
جۇنىسبەكوۆانىڭ ايتۋىنشا، تەرگەۋ بارىسىندا ءماجىتوۆ ءوز ادۆوكاتىنىڭ كومەگىمەن مامىلەگە قاتىسى جوق ەكەنىن العا تارتىپ، كەلىسىمشارتتى بۇزۋ تۋرالى تالاپ قويعان. كەلىسىمدەر بۇزىلعان سوڭ، پاتەرلەر AV-Construction كومپانياسىنىڭ بالانسىندا قالعان.
سوعان قاراماستان، ولگا ابدىعاپپاروۆاعا وسى مۇلىكتى ۇرلاماق بولدى دەگەن ايىپ تاعىلىپ وتىر.
الماتىداعى Esentai City جوباسىن قولعا العان AV-Construction كومپانياسى سوڭعى جىلدارى ءبىرقاتار داۋلى قىلمىستىق ىسكە ىلىككەن. ساۋلە جۇنىسبەكوۆا مۇنى بيزنەسكە جاسالعان رەيدەرلىك قىسىم دەپ باعالايدى.
