Májilis tóraǵasy Erlan Qoshanov Prezidenttiń Joldaýyna bailanysty pikir bildirip, bir palataly Parlament qurý bastamasyna qoldaý kórsetti, dep habarlaidy Dalanews.kz.
Onyń aitýynsha, bul – memleketimizdiń damý baǵytyna sai júieli ári baiypty reforma bolmaq.
"Joldaý Prezidentimizdiń "barlyq reformanyń ózegi – adam" degen basty qaǵidatty úzdiksiz ustanyp kele jatqanyn taǵy da dáleldedi. Elimizde atqarylyp jatqan igi isterdiń barlyǵy halyq úshin jáne halyqpen birge jasalyp jatyr. Bul – Memleket basshysynyń berik ustanymy", – dedi Erlan Qoshanov.
Onyń sózinshe, Joldaýda elimiz úshin taǵy bir mańyzdy reforma – Parlamenttik reforma usynylǵan. Bul bastama qoǵammen birge talqylanyp, halyqtyń sheshimimen qabyldanýy tiis.
"Memleketimizdiń bolashaǵyna qatysty taǵdyrsheshti máseleniń bári halyqtyń talqysyna salynyp, sheshim qabyldaýdy halyqtyń ózine berý – Prezidentke tán ashyq basqarý stili. Bul azamattardyń pikirin qurmetteý jáne jańa saiasi mádeniet qalyptasqanyn kórsetedi", – dedi Májilis tóraǵasy.
Erlan Qoshanovtyń aitýynsha, bir palataly Parlament ideiasy qoǵamda burynnan talqylanyp keledi. 2022 jylǵy konstitýtsiialyq reforma barysynda osy baǵyttaǵy alǵashqy qadamdar jasalǵan.
"Bul bastama kezeń-kezeńimen iske asyp kele jatqan júieli, baiypty reformalardyń jalǵasy retinde qabyldanýy qajet. Ol uzaq ýaqytty ári tutas qoǵamnyń atsalysýyn talap etetin tereń institýtsionaldyq reforma ekenin túsingen jón. Sondyqtan aldaǵy jyly sarapshylardyń, saiasi partiialardyń, azamattyq qoǵamnyń qatysýymen jan-jaqty talqylaý júrgizemiz", – dedi ol.
Sonymen birge Májilis tóraǵasy búginde ár azamattyń eldiń saiasi ómirine erkin aralasýyna múmkindik bar ekenin atap ótti.
"Aýyl, aýdan, qala ákimderin tikelei sailaý júiesi ornyqty. Jergilikti máslihattarǵa da majoritarlyq júie arqyly sailaý ótip jatyr. Keleshektegi bir palataly Parlamentti partiialyq tizimmen jasaqtaý partiialardyń rólin arttyrady, biliktiń myzǵymas institýty retinde qalyptastyrady. Belsendi azamattar óz ustanymy men kózqarasyna sai keletin partiiaǵa múshe bolyp, Parlamentke kelip, eldiń taǵdyryna aralasa alady. Mundai júie álemdik tájiribede keńinen taraǵan", – dedi Qoshanov.
