ءماجىلىس ءتوراعاسى ەرلان قوشانوۆ پرەزيدەنتتىڭ جولداۋىنا بايلانىستى پىكىر ءبىلدىرىپ، ءبىر پالاتالى پارلامەنت قۇرۋ باستاماسىنا قولداۋ كورسەتتى، دەپ حابارلايدى Dalanews.kz.
ونىڭ ايتۋىنشا، بۇل – مەملەكەتىمىزدىڭ دامۋ باعىتىنا ساي جۇيەلى ءارى بايىپتى رەفورما بولماق.
"جولداۋ پرەزيدەنتىمىزدىڭ "بارلىق رەفورمانىڭ وزەگى – ادام" دەگەن باستى قاعيداتتى ۇزدىكسىز ۇستانىپ كەلە جاتقانىن تاعى دا دالەلدەدى. ەلىمىزدە اتقارىلىپ جاتقان يگى ىستەردىڭ بارلىعى حالىق ءۇشىن جانە حالىقپەن بىرگە جاسالىپ جاتىر. بۇل – مەملەكەت باسشىسىنىڭ بەرىك ۇستانىمى"، – دەدى ەرلان قوشانوۆ.
ونىڭ سوزىنشە، جولداۋدا ەلىمىز ءۇشىن تاعى ءبىر ماڭىزدى رەفورما – پارلامەنتتىك رەفورما ۇسىنىلعان. بۇل باستاما قوعاممەن بىرگە تالقىلانىپ، حالىقتىڭ شەشىمىمەن قابىلدانۋى ءتيىس.
"مەملەكەتىمىزدىڭ بولاشاعىنا قاتىستى تاعدىرشەشتى ماسەلەنىڭ ءبارى حالىقتىڭ تالقىسىنا سالىنىپ، شەشىم قابىلداۋدى حالىقتىڭ وزىنە بەرۋ – پرەزيدەنتكە ءتان اشىق باسقارۋ ءستيلى. بۇل ازاماتتاردىڭ پىكىرىن قۇرمەتتەۋ جانە جاڭا ساياسي مادەنيەت قالىپتاسقانىن كورسەتەدى"، – دەدى ءماجىلىس ءتوراعاسى.
ەرلان قوشانوۆتىڭ ايتۋىنشا، ءبىر پالاتالى پارلامەنت يدەياسى قوعامدا بۇرىننان تالقىلانىپ كەلەدى. 2022 جىلعى كونستيتۋسيالىق رەفورما بارىسىندا وسى باعىتتاعى العاشقى قادامدار جاسالعان.
"بۇل باستاما كەزەڭ-كەزەڭىمەن ىسكە اسىپ كەلە جاتقان جۇيەلى، بايىپتى رەفورمالاردىڭ جالعاسى رەتىندە قابىلدانۋى قاجەت. ول ۇزاق ۋاقىتتى ءارى تۇتاس قوعامنىڭ اتسالىسۋىن تالاپ ەتەتىن تەرەڭ ينستيتۋسيونالدىق رەفورما ەكەنىن تۇسىنگەن ءجون. سوندىقتان الداعى جىلى ساراپشىلاردىڭ، ساياسي پارتيالاردىڭ، ازاماتتىق قوعامنىڭ قاتىسۋىمەن جان-جاقتى تالقىلاۋ جۇرگىزەمىز"، – دەدى ول.
سونىمەن بىرگە ءماجىلىس ءتوراعاسى بۇگىندە ءار ازاماتتىڭ ەلدىڭ ساياسي ومىرىنە ەركىن ارالاسۋىنا مۇمكىندىك بار ەكەنىن اتاپ ءوتتى.
"اۋىل، اۋدان، قالا اكىمدەرىن تىكەلەي سايلاۋ جۇيەسى ورنىقتى. جەرگىلىكتى ءماسليحاتتارعا دا ماجوريتارلىق جۇيە ارقىلى سايلاۋ ءوتىپ جاتىر. كەلەشەكتەگى ءبىر پالاتالى پارلامەنتتى پارتيالىق تىزىممەن جاساقتاۋ پارتيالاردىڭ ءرولىن ارتتىرادى، بيلىكتىڭ مىزعىماس ينستيتۋتى رەتىندە قالىپتاستىرادى. بەلسەندى ازاماتتار ءوز ۇستانىمى مەن كوزقاراسىنا ساي كەلەتىن پارتياعا مۇشە بولىپ، پارلامەنتكە كەلىپ، ەلدىڭ تاعدىرىنا ارالاسا الادى. مۇنداي جۇيە الەمدىك تاجىريبەدە كەڭىنەن تاراعان"، – دەدى قوشانوۆ.
