Tipti, AQSh sheneýnikteri Reseidiń dástúrli yqpal etý aimaǵyndaǵy Ortalyq Aziia eline barǵan kezde Ózbekstan Vashingtonmen qorǵanys salasyndaǵy bailanystaryn joǵary baǵalap, maqtanyp jatty.
Burynǵy keńestik respýblikalar, sonyń ishinde Ózbekstan qaýipsizdik kepildigin izdep, talaidan bergi tarihi seriktesi Reseiden alystap, AQSh-qa bet buryp keledi. Bul protsess Máskeýdiń Ýkrainaǵa basyp kirýinen keiin jedeldei tústi.
«Eki el arasyndaǵy qorǵanys salasyndaǵy dostyq qarym-qatynastar jyl saiyn nyǵaiyp keledi», – dedi Ózbekstan qorǵanys ministri Bahodir Qurbanov AQSh qorǵanys ministrliginiń ókilderimen kezdesýinde.
Ózbekstan tarapy quramynda AQSh Ortalyq qolbasshylyǵynyń basshysy Maikl Kirilla bar delegatsiiany qarsy aldy.
«Kezdesý barysynda taraptar áskeri saladaǵy jetistikter men yntymaqtastyqty jalǵastyrý múmkindikterin talqylady», – delingen Qorǵanys ministrliginiń habarlamasynda.
Ortalyq Aziiadaǵy shamamen 35 million halqy bar Ózbekstan bir kezderi Resei bastaǵan UQShU qaýipsizdik aliansynyń múshesi bolǵan. Biraq 2012 jyly «AQSh Tashkentti strategiialyq odaqtas retinde qaraidy» degen qaýesetterden keiin uiymnan shyǵyp ketti.
Tashkent 2000 jyldardyń basynda AQSh kúshterine óziniń keńestik dáýirdegi K-2 áýe bazasyn kórshi Aýǵanstanda áskeri operatsiialardy bastaý úshin paidalanýǵa ruqsat berse, al 2020 jyly AQSh kúshterimen birlesken jattyǵýlar ótkizdi.
AQSh pen Ózbekstan arasyndaǵy kelissózder taǵy bir burynǵy keńestik respýblika quramyna kirgen, keiin UQShU-ǵa múshe bolǵan Armeniianyń saiasi áreketinen keiin bastaldy. Iaǵni, Armeniia Reseidi Ázirbaijannyń Taýly Qarabaqtaǵy armian separatisterine qarsy shabýylyna aralaspaǵany úshin syn tegeýrinine alǵan edi. Dese de, Resei eki jaqty ymyraǵa keltirýdi emes, alaýyzdyq týǵyzýǵa kúsh saldy.
