Álqissa, atalǵan anyqtamany talap etýdi kúshinen qaldyrý, shyny kerek, ońaiǵa túsken joq. Tup-týra 2015 jyldyń 9 aqpanynan («QR Keibir zańnamalyq aktilerine halyqtyń kóshi-qony jáne jumyspen qamtylýy máseleleri boiynsha ózgertýler men tolyqtyrýlar engizý týraly» Zań jobasyna bailanysty qurylǵan jumys tobynyń Májiliste alǵashqy otyrysy bolyp ótken kúnnen) bastalǵan kúres – eki jyl, jeti ai, toǵyz kún degende jeńispen aiaqtaldy. Dál Alashtyń arystany Qanat baýyrym Islamnyń kezekti jeńisiniń qarsańynda!
Biyl 23 maýsymda Astanada ótken Dúniejúzi qazaqtarynyń V quryltaiyndaǵy Elbasymyzdyń «Elge kelgennen soń qujat túgendeý úshin ári-beri sabylý bolmaýy kerek. Qytai qazaqtarynyń sottalǵany nemese sottalmaǵany týraly anyqtama alý jaiy aǵaiynnyń arǵy bettegi eńbegine problemalar týǵyzady. Ony shekara turǵysynan sol jerde anyqtap, elmenen aqyldasyp, kelisip sheshý kerek!» - degen tapsyrmasyna sai, «Sheteldikterge jáne azamattyǵy joq adamdarǵa Qazaqstan Respýblikasynda ýaqytsha jáne turaqty turýǵa ruqsattar berý qaǵidalaryn bekitý týraly» Qazaqstan Respýblikasy Ishki ister ministrliginiń 2015 jylǵy 4 jeltoqsandaǵy №992 buiryǵyna tolyqtyrý engizilip, atalǵan buiryq Qazaqstan Respýblikasynyń Ádilet ministrliginde 2017 jyly 04 qyrkúiekte №12880 bolyp qaita tirkeldi.
Iaǵni, osy Buiryqtyń (Qaǵidanyń) 10-tarmaǵyndaǵy «azamattyǵy tiesililigi nemese turaqty turatyn memlekette sottylyǵy (sottylyǵynyń bolmaýy) týraly tiisti memlekettiń quzyretti organy bergen qujat;» - dep atalatyn 6)-tarmaqshasyna bizdiń ótinishimiz boiynsha «(QYTAI HALYQ RESPÝBLIKASY AZAMATTARYNYŃ ETNIKALYQ QAZAQTARYN QOSPAǴANDA, EGER ÓZGE HALYQARALYQ ShARTTARDA KÓZDELMESE);» - degen eskertpe qosyldy.
Endi Qazaqstan Respýblikasyna kelip, turaqty tirkeýge turyp, yqtiiarhat alarda, Ishki ister ministrliginiń Kóshi-qon politsiiasy Qytai Halyq Respýblikasynan kóship kelgen etnikalyq qazaqtardan «SOTTYLYQ TÝRALY» anyqtama talap etpeidi. Qandastarymyz «SOTTYLYQ TÝRALY» qujatyn rastatý úshin baitaq Qazaqstannyń túkpir-túkpirinen Astana men Almatyǵa sabylatyn, odaǵy Qytaidyń Konsýldyǵyna baryp aptalap telmiretin tarih óz paraǵyn osy jerden japty! Dúniede ózgeniń qolyna qaraǵan, bosaǵasynda telmirgen kiriptarlyqtan ótken qorlyq, ái, joq shyǵar?! Sol kiriptarlyqtan qutyldy, qandastarymyz!
Sóitip, qujat jinaýdyń azaby men tozaǵyn bir kisidei tartqan Qytaidan oralǵan qandastarymyz «QOSh BOL, «SOTTYLYQ TÝRALY» ANYQTAMA! QOSh BOL, QYTAI ELShILIGI!» - deitin kúnge de, mine, jetti-aý, shirkin!
Ult Kóshbasshysy Nursultan Ábishuly Nazarbaevtyń Qazaqstan Táýelsizdigin almai turyp jolǵa qoiǵan «Kóshi-qon» atty TUŃǴYSh hám ULY saiasatyn qoldaý, onyń Zańnamsyn kemeldendirý, alystaǵy aǵaiynnyń Atajurtyna keletin jolyn dańǵyratyp ashý jolyndaǵy Aýyt Muqibektiń de sońǵy bes-alty jyldyń kólemindegi hat jazýmen ótken uiqysyz túnderi; arystandarmen alysqan, jolbarystarmen julqysqan azapty ailary; jumyssyz qalyp, sergeldeńge túsken jyldary, mine, bir-aq kúnde qýanyshqa ainaldy. Endi ol ótken kúnniń belgisi retinde «ZAŃ TÚZELDI, QANDASYM, SEN DE TÚZEL!» degen qalyń kitabynyń ár betinde tasqa basylyp qala beredi!
Obaly káne, bul máseleniń oń sheshilýine táýeldi-táýelsiz qazaq baspasóz- aqparat quraldarynyń qabyrǵaly toby – «Dat», «Jas Alash», "Qala men Dala" gazeti, «Qazaq úni», «Alataý», «Tórtinshi Bilik» gazetteri, «31», «KTK», «QAZAQSTAN», «Habar» telearnaly jáne «Alashainasy.kz», «Baq.kz», «Qamshy.kz», «Saigez.kz», «Minber.kz» aqparattyq portaldary aianyp qalǵan joq. Reti kelgende batyl-batyl ún qatyp, qoldap otyrdy. Sonyń ishinde, áigilep turyp aitaiyn, «Kóshi-qon» degen taqyrypty kún tártibinen túsirmei, sońyna deiin kótere bilgen «Abai.kz» aqparattyq portalyna, búkil shetten kelgen qazaqtar, qaryzdarmyz! Osy taqyrypty kún qurǵatpai kótergeni úshin «Abai.kz» tendrden de qaǵyldy. Biraq, eshkimnen eshqashan qaimyqqan joq, qandastarynyń múddesin qasqaiyp turyp qorǵady. Bir sózben aitqanda, «Jaza almasań, saǵan sert! Basa almasam, maǵan sert!» dep Dáýren Qýat baýyrymyz ustanymynan taimady jáne onyń eki sardary – Qanat Ábilqaiyr men Nurgeldi Ábdiǵaniuly da bul máselede tabandylyq tanytty. Al, tendrge kelgende, tabanynyń búri joq qýlardyń bul taqyryptan taiqyp ketkenin de estidik. Eger, shegara asyp kelgen qandastarymyzdyń atqaminer azamattary ult úshin birdeme isteiik dep bekise, olar jumysyn eń aldymen «Abai.kz» aqparattyq portalyn qoldaýdan bastaýy kerek!
«Alystan kelgen aǵaiyn» degen aty bar bul qaýym bul kúnde bir jarym millionǵa taiaǵan, múmkin, odan da kóp qara orman halyqqa ainalyp, úiirin taýyp, qasietti qazaq jeriniń barlyq pushpaǵyna irge teýip úlgirdi. Elbasy saiasatynyń arqasynda olardyń eńsesi biik, rýhy asqaq. Júz jasaǵyr Ult Kóshbasshysy Nursultan Nazarbaev jaqynda ǵana Astanada ótken Dúniejúzi qazaqtarynyń V quryltaiynda «Elim, jerim dep eńiregen árbir qazaqqa Qazaqstannyń esigi árqashan ashyq, aiqara ashyq. Eshkimge shekteý joq!» -dep, qazaq kóshiniń bolashaq taǵdyryn taǵy bir márte shegelep qoidy. Bul kósh endi eshqashan toqtamaq emes jáne eshkim de toqtata almaq emes! Júiesin taýyp, júrektilikpen saýatty aita bilsek, tabandylyqpen óz deńgeiinde úzdiksiz kótere alsaq, oryndy ótinishimizdiń jerde qalmai, oryndalatynyna da kózderińiz ábden jetken shyǵar, Ardaqty Aǵaiyn!
Osy jerde biliktiń biik-biik butaǵynda otyrǵan quzyrly oryn basshylaryna qolymyzdyń jetýine, ótinishimizdi tapsyrýǵa, júieden shetten kelgen aǵaiynnyń eń kilteń máselelerin sheshýde «Nur Otan» partiiasynyń, onyń Respýblikalyq qoǵamdyq qabyldaý bólmesiniń óte-óte zor yqpaly bolǵanyn rizashylyqpen aita ketý – buljymas paryz maǵan! Mine, biyl «KÓSh KÓLIKTI BOLSYN!»respýblikalyq aktsiiasy aiasynda kóshi-qon máseleleri boiynsha azamattardy taqyryptyq qabyldaýdyń tujyrymdamasy jasaldy. Atalǵan aktsiia biylǵy sońǵy jarty jyldyǵynan bastap Respýblika boiynsha, kezegi kelgende, ótip turatyn bolyp, «Nur Otan» partiiasynyń josparyna kirdi. Al, aktsiianyń tusaýy 2017 jylǵy 14 shildede kesildi.
Aýyt aqyn endigi jerde Ishki ister ministiri Qalmuhanbet Qasymov aǵasyna alǵysyn aityp, qolyn qysady da, Eńbek jáne halyqty áleýmettik qorǵaý ministri Tamara Dúisenovany betke alady.
Sebebi, búgingi tańda «...eki el arasynda kelisim joq!» degen keranaý ýájben shetelden kelgen zeinet jasyndaǵy ata-apalarymyzdyń ZEINETAQYSY nebary 11-12 myń teńgeniń kóleminde ǵana qalyp otyr. Kelip, memlekettik qyzmetke turǵan qandastarymyzdyń sheteldegi EŃBEK ÓTILI esepke alynbai keledi...
Tamara Bosymbekqyzy da qazynaly elde týǵan qazaqtyń erkekke bergisiz isker qyzy. Alla qalasa, «Nur Otanym» men «Abai.kz»-tim aman bolsa, bul másele de óz sheshimin taýyp qalar degen zor úmittemiz.
Bárin ait ta – birin ait, búginnen bastap turaqty tirkeýge turýǵa kedergi joq, Zań túzeldi! Bul – «Halyqtyń kóshi-qony týraly» Zańǵa, ózimiz oilaǵandai, túbegeiliózgeris engizildi degen sóz!!
Qandasym, taǵy bir márte qaitalap aitaiyn, endi sen de túzel!
Aýyt Muqibek
18.09.2017
Astana
Abai.kz
