Qazaqstan investorlar, biznes ókilderi jáne ózge de shetel azamattary úshin elge kirý, viza rásimdeý jáne ruqsat qujattaryn alý tártibin ońtailandyrýda, dep habarlaidy Dalanews.kz
Jeńildetilgen jáne investitsiialyq rejimder aiasynda túrli preferentsiialardyń keń aýqymy usynylǵan. Bul degenimiz – investorlar men kásipkerler arnaiy vizalyq rejimderdi, ótinimderdi jedel qaraý rásimderin, sondai-aq investitsiialyq jobalardy súiemeldeý tetikterin paidalana alady degen sóz.
Jeńildetilgen sharttar suranysqa ie mamandyqtar boiynsha Qazaqstanda jumys isteý úshin keletin shetel azamattaryna, sondai-aq memlekettik organdardyń qoldaýhaty bolǵan jaǵdaida ekonomikalyq jáne áleýmettik jobalarǵa qatysýshylarǵa da qoljetimdi.
Tsifrlyq tehnologiialardyń qarqyndy damýy jahandyq eńbek naryǵyn túbegeili ózgertýde. Álemde jasandy intellektpen jumys isteý daǵdylary bar mamandarǵa suranys artyp keledi. Osyǵan bailanysty suranysqa ie mamandyqtar tiziminde erekshe nazar IT salasyna aýdarylǵan (jasandy intellekt injeneri, aqparattyq júieler arhitektory, qosymsha ázirleýshi, aqparattyq qaýipsizdik injeneri jáne t.b.). Sonymen qatar densaýlyq saqtaý (neirohirýrg, gematolog, onkolog, sáýlelik diagnostika dárigeri jáne t.b.), kreativti indýstriia (grafikalyq dizainer, dybys rejisseri, grafikalyq animatsiia tehnigi jáne t.b.), jaratylystaný ǵylymdary, injenerlik jáne óńdeý salalarynda da (farmatsevtikalyq óndiris injener-tehnology, lazerlik jabdyqtar injeneri, bakteriolog jáne t.b.) suranys joǵary.
Eýraziialyq ekonomikalyq odaqqa (Armeniia Respýblikasy, Belarýs Respýblikasy, Qyrǵyzstan, Resei Federatsiiasy) múshe memleketterdiń azamattary úshin de qolaily jaǵdailar jasalǵan.
EAEO aiasynda qatysýshy elderdiń azamattary Qazaqstan aýmaǵynda ruqsat qujattaryn almai-aq erkin jumysqa ornalasý quqyǵyna ie. Bul jumys kúshiniń joǵary mobildiligin qamtamasyz etip, ekonomikalyq yntymaqtastyqtyń damýyna oń áserin tigizedi. Aita ketý kerek, dál osyndai qaǵidat boiynsha qazaqstandyqtar da odaqqa múshe elderde eńbek etýde.
Odaqqa múshe emes elderdiń azamattary úshin eńbek naryǵynyń qajettilikteri men kvotalaý negizinde qurylǵan jumys kúshin tartý júiesi qoldanylady. Bul tásil ekonomika múddeleri men ishki eńbek naryǵyn qorǵaý arasyndaǵy tepe-teńdikti saqtaýǵa múmkindik beredi. Osylaisha Qazaqstan ashyq ári teńgerimdi kóshi-qon saiasatyn qalyptastyryp keledi.
2026 jyldyń basynan beri suranysqa ie mamandyqtar boiynsha sheteldik jumys kúshin tartýǵa 5,1 myń ruqsat berildi, al eńbek immigranttaryna shamamen 75 myń ruqsat rásimdeldi.
QR Eńbek jáne halyqty áleýmettik qorǵaý ministrligi ishki eńbek naryǵyn qorǵaý maqsatynda jyl saiyn jumys berýshilerdiń suranysyna sáikes sheteldik jumys kúshin tartý kvotasyn belgilep, bóledi.
2026 jylǵa arnalǵan sheteldik jumys kúshin tartý kvotasy 23,6 myń adamdy quraidy, al eńbek immigranttaryn tartý kvotasy 221,8 myń adam deńgeiinde aiqyndalǵan.
Sonymen qatar eldiń ornyqty damýyn qamtamasyz etýge jáne Qazaqstanmen óz bolashaǵyn bailanystyratyn, iaǵni azamattyq alýǵa nietti shetel azamattaryn qabyldaý sapasyn arttyrýǵa baǵyttalǵan kóshi-qon saiasaty júieli túrde jetildirilýde.
Osyǵan bailanysty turaqty turýǵa ruqsat alý tetiginiń zamanaýi tsifrlyq tásilder men ashyqtyq qaǵidattaryna negizdelgen jańartylǵan tetigi engizilýde.
Jańa tártip úmitkerlerdi kezeń-kezeńimen baǵalaýdy kózdeidi: memlekettik tildi bazalyq deńgeide meńgerýin tekserý, saýalnamalyq derekterdi taldaý, tsifrlyq skoring, ýákiletti memlekettik organdar tarapynan tekserýler, sondai-aq qorytyndy suhbat.
Bul tetik Qazaqstandy uzaq merzimge qonystanyp, qoǵam ómirine belsendi aralasatyn el retinde tańdaityn azamattarǵa baǵyttalǵan.
Atalǵan tásildi iske asyrý turaqty turýǵa nietti adamdardy neǵurlym dál ári teńgerimdi qabyldaýdy qamtamasyz etip, kóshi-qon úderisteriniń tiimdiligin arttyrýǵa jáne áleýmettik turaqtylyqty nyǵaitýǵa múmkindik beredi. Jalpy, qabyldanyp jatqan sharalar memleket, qoǵam jáne ekonomika múddelerine sai keletin ashyq, pragmatikalyq ári jaýapty kóshi-qon saiasatyn qalyptastyrýǵa baǵyttalǵan.
