Almaty oblysynda órtengen kúii tabylǵan politsiia qyzmetkeri Aslan Álserovke qatysty jańa málimetter áleýmettik jelide tarady. Sondai-aq marqumnyń jaqyndary onyń videosyn jariialap, eldi tolqytqan oqiǵaǵa qatysty jazba qaldyrdy, dep habarlaidy dalanews.kz.
Buǵan deiin belgili bolǵandai, Aslan Álserov Almaty qalasyndaǵy Áýezov aýdandyq politsiia bóliminde qyzmet etken. Qaiǵyly jaǵdaiǵa bailanysty qazir tergeý amaldary júrgizilip jatyr. Is boiynsha marqumnyń jubaiy, eki uly jáne olardyń 14 jastaǵy dosy kúdikke ilingen.
Tergeý nusqasy boiynsha, oqiǵa bolǵan kúni politsiia qyzmetkeri úiine kesh kelgen. Keiin úi ishinde janjal shyǵyp, onyń sońy tóbeleske ulasqan bolýy múmkin. Aldyn ala málimetke sáikes, jasóspirimderdiń biri er adamdy basynan aýyr zatpen urǵan degen boljam bar.
Osydan keiin kúdiktiler es-tússiz jatqan er adamdy kólikke salyp, Almaty oblysy Kegen aýdany baǵytyna alyp ketken bolýy múmkin. Tergeý málimetinshe, marqumnyń denesi Kókpek – Kóktal – Kegen tas jolynan taýǵa qarai shamamen jarty shaqyrym jerde tabylǵan.
Qaiǵyly oqiǵadan keiin marqumnyń qaryndasy Aqerke Qaliaqparova Instagram paraqshasynda aǵasyn joqtap, júrek tebirenter jazba jariialady.
"Bárimizdi qorǵap júrgen ardaqty aǵatai... Bul qaraly habardy qabyldaý óte aýyr boldy. Sizdei elge qorǵan bolǵan, árdaiym halyqtyń tynyshtyǵy úshin qyzmet etken azamattyń ómirden ótýi júrekke qatty batty", – dep jazdy ol.
Aqerke Qaliaqparova aǵasynyń elge adal qyzmet etkenin aityp, onyń jarqyn beinesi jaqyndarynyń júreginde máńgi saqtalatynyn jetkizdi.
"Qaryndasyńyz retinde sizge degen qurmetim men alǵysym sheksiz. Jyly júzińiz, qarapaiym minezińiz, elge degen adal qyzmetińiz eshqashan umytylmaidy. Sizdiń jarqyn beineńiz árdaiym júregimizde saqtalady. Janyńyz jánnatta bolsyn, aǵatai. Qosh bolyńyz, batyr aǵatai", – dedi ol.
