Petropavl mańyndaǵy aýyl turǵyndary úilerine belgilengen ótemaqy somasymen kelispei otyr. Memlekettik mamandar súrýge jatatyn baspanalardy bar-joǵy 4 million teńgege baǵalaǵan, dep habarlaidy Dalanews.kz 31-arnaǵa silteme jasap.
Úi ieleri naryqtyq qundy eskerip, qaita baǵalaý júrgizýdi talap etýde. 2024 jylǵy sý tasqynynan keiin ondaǵan baspana memleket menshigine qaitarylyp, olardyń ornyna damba salý josparlanǵan. Sý basý qaýpi bar aimaqtaǵy úiler biyl súrilmek.
"Berilgen qarajat jer satyp alýǵa da jetpeidi. Jasym 70-te, úi salýǵa shamam joq. Daiyn úi alýǵa da aqsha jetpeidi, bar bolǵany 4 million teńge beredi", – deidi aýyl turǵyny Raihan Sýraǵanova.
Turǵyndardyń aitýynsha, qazirgi úi baǵasymen memleket usynyp otyrǵan somaǵa tipti qora da turǵyzý múmkin emes. Buǵan deiin olarǵa jóndeý úshin 2 million teńge berilgenimen, ol qarajat shyǵyndy jappaǵan: sý men elektrdi halyq óz qarjysyna júrgizgen.
Al ákimdik ókilderi túpkilikti sheshim áli qabyldanbaǵanyn málimdedi.
"Munda eki sheshim bar. Birinshisi – barlyq úidi súrip, turǵyndardy basqa jerge kóshirý. Ekinshisi – úilerdi qaldyryp, dambanyń biiktigin kóterý. Qaisysy tiimdi bolsa, sol júzege asady. Tolyq esep-qisaptan keiin túpkilikti sheshim qabyldanady", – dedi Qyzyljar aýdany ákiminiń orynbasary Azat Ybraev.
Alaida turǵyndar baspanasyz qalamyz ba dep alańdap otyr. Eger ótemaqy mólsheri ózgermese, olar sotqa júginýge nietti.
