پەتروپاۆل ماڭىنداعى اۋىل تۇرعىندارى ۇيلەرىنە بەلگىلەنگەن وتەماقى سوماسىمەن كەلىسپەي وتىر. مەملەكەتتىك ماماندار سۇرۋگە جاتاتىن باسپانالاردى بار-جوعى 4 ميلليون تەڭگەگە باعالاعان، دەپ حابارلايدى Dalanews.kz 31-ارناعا سىلتەمە جاساپ. 

ءۇي يەلەرى نارىقتىق قۇندى ەسكەرىپ، قايتا باعالاۋ جۇرگىزۋدى تالاپ ەتۋدە. 2024 جىلعى سۋ تاسقىنىنان كەيىن ونداعان باسپانا مەملەكەت مەنشىگىنە قايتارىلىپ، ولاردىڭ ورنىنا دامبا سالۋ جوسپارلانعان. سۋ باسۋ ءقاۋپى بار ايماقتاعى ۇيلەر بيىل سۇرىلمەك.

"بەرىلگەن قاراجات جەر ساتىپ الۋعا دا جەتپەيدى. جاسىم 70-تە، ءۇي سالۋعا شامام جوق. دايىن ءۇي الۋعا دا اقشا جەتپەيدى، بار بولعانى 4 ميلليون تەڭگە بەرەدى"، – دەيدى اۋىل تۇرعىنى رايحان سۋراعانوۆا.

تۇرعىنداردىڭ ايتۋىنشا، قازىرگى ءۇي باعاسىمەن مەملەكەت ۇسىنىپ وتىرعان سوماعا ءتىپتى قورا دا تۇرعىزۋ مۇمكىن ەمەس. بۇعان دەيىن ولارعا جوندەۋ ءۇشىن 2 ميلليون تەڭگە بەرىلگەنىمەن، ول قاراجات شىعىندى جاپپاعان: سۋ مەن ەلەكتردى حالىق ءوز قارجىسىنا جۇرگىزگەن.

ال اكىمدىك وكىلدەرى تۇپكىلىكتى شەشىم ءالى قابىلدانباعانىن مالىمدەدى.

"مۇندا ەكى شەشىم بار. ءبىرىنشىسى – بارلىق ءۇيدى ءسۇرىپ، تۇرعىنداردى باسقا جەرگە كوشىرۋ. ەكىنشىسى – ۇيلەردى قالدىرىپ، دامبانىڭ بيىكتىگىن كوتەرۋ. قايسىسى ءتيىمدى بولسا، سول جۇزەگە اسادى. تولىق ەسەپ-قيساپتان كەيىن تۇپكىلىكتى شەشىم قابىلدانادى"، – دەدى قىزىلجار اۋدانى اكىمىنىڭ ورىنباسارى ازات ىبرايەۆ.

الايدا تۇرعىندار باسپاناسىز قالامىز با دەپ الاڭداپ وتىر. ەگەر وتەماقى مولشەرى وزگەرمەسە، ولار سوتقا جۇگىنۋگە نيەتتى.