Zıaly qaýymmen kezdesýde Atqarýshy hatshy jańa oblystar qurylǵannan keıin Qonaev qalasy Almaty oblysynyń ákimshilik ortalyǵy retinde osy óńirdiń damýyna qosymsha serpin beretinin atap ótti.
– Qonaev qalasynyń turǵyndary – Memleket basshysynyń halyqqa Joldaýynda aıtylǵan elimizdegi aýqymdy ózgeristerdi qyzý qoldaǵan alǵashqylardyń biri. Endi saıası reformalar baǵytyn tolyq júzege asyrý úshin «Ekinshi Respýblıkanyń» saıası irgetasy bolatyn konstıtýsıalyq reforma júrgizý usynylyp otyr. Elimiz demokratıalyq qaǵıdattardy tolyǵymen ustanady. Buǵan Ata Zańǵa ózgerister men tolyqtyrýlar azamattardyń jappaı daýys berýi arqyly engiziletindigi dálel bola alady. Biz qala turǵyndary da oǵan belsendi qatysatynyna senimdimiz, – dedi Ashat Oralov.
Óz kezeginde, İle aýdany ardagerler keńesiniń múshesi Erbol Turymbetov oblys jáne qaladaǵy zıaly qaýym ókilderi, aqsaqaldar, mádenıet jáne sport qaıratkerleri daýys berýge shyǵarylatyn túzetýlerdiń mańyzdylyǵyn túsindirý jumystaryna belsendi qatysyp jatqanyn habarlady.
– Referendým – bul halqymyz úshin synaq ispetti. Kezdesýler barysynda halyqtyń bul bastamany joǵary baǵalaıtynyn jáne daýys berýge qatysýǵa daıyn ekendigin kóremiz. Óıtkeni eldegi kez kelgen ózgeris túptep kelgende Ata Zańǵa baılanysty ekeni belgili, – dep atap ótti Erbolat Turymbetov.
Partıa aktıviniń jıyny barysynda Ashat Oralov amanattyqtar Memleket basshysynyń qoǵamdyq tiregi jáne eldiń eń iri saıası kúshi bola otyryp, barlyq ózgeristiń aldyńǵy shebinde bolýǵa tıis ekenin atap ótti. Onyń aıtýynsha, partıa da búkil elimiz sıaqty, transformasıa prosesin bastan ótkerýde jáne qazir qazaqstandyqtardyń Qasym-Jomart Toqaev usynǵan reformalar baǵyty tóńireginde toptasýy mańyzdy.
Qalalyq sý elektr stansasynyń ujymymen júzdesý barysynda da aldaǵy ózgerister jaıy talqylandy. Kezdesýge qatysýshylar jalpyhalyqtyq referendým ótkizýdi qoldap, daýys berý kúni qala turǵyndary joǵary belsendilik tanytatynyna senim bildirdi.
Partıanyń Almaty oblystyq fılıalynda «AMANAT»-tyń 90 myńnan astam múshesi jáne 307 bastaýysh partıa uıymy bar.
