Aijan Abraimovany Eńbek adamy, búginginiń batyry desek, artyq etpeidi. Ol – Qonaev qalasyndaǵy aýtizm spektri jáne sóileý qabileti buzylǵan balalarǵa arnalǵan jalǵyz túzetý ortalyǵyn ashqan ana, – dep habarlaidy Dalanews.kz Qonaev qalasy ákiminiń baspasóz qyzmetine silteme jasap.
– Ózim erekshe bala tárbielep otyrmyn. Meniń balamnan basqa, Qonaevta aýtist diagnozy qoiylǵan búldirshinder óte kóp. Sondyqtan olarǵa kómek berý úshin túzetý-damytý ortalyǵyn ashýdy jón kórdim. Aldymen aqsha jinap, 3 bólmeli páter satyp aldym. Keiinnen Mansap ortalyǵy usynǵan memlekettik granttyń konkýrsyna qatysyp, kómek aldym. Sóitip, ortalyqtyń irgesin qaladym, – deidi Aijan.
Ortalyqta emdik massaj, jattyǵý jasatý, neiropsihologtyń kómegi, logopedpen jumys jasaý sekildi qyzmetter kórsetiledi.
– Qazir bizge 12 bala tegin, 17 bala aqyly túrde keledi. Ortalyqta áleýmettik osal toptan shyqqan 4 ana, 2 múgedektigi bar adamdy jumyspen qamtyp otyrmyz. Olardy buǵan deiin eshkim jumysqa qabyldamaǵan. Bul – tym jaqsy qoldaý dep bilemin. Sebebi, olar qazir aqsha taýyp, otbasyn asyrap ári qoǵamǵa úlken paida tigizýde, – dedi keiipker.
– Kei balalar, tipti, kámpitti óz betinshe jei almaityn. Qazir olar birtindep is-áreketke jarap qaldy. Al bir anamyz óziniń balasynyń 7 jasta sóilegenin alǵash ret estidi. Ońaltý, emdik sharalardan keiin bir balamyzdyń densaýlyǵy jaqsaryp, kánigi balabaqshaǵa baratyn qurdastarynyń qataryna qosyldy. Aita bersek, árine, kóp. Men biraq balapandardyń ómiriniń ózgerýine yqpal etip jatqanymyzǵa óte qýanyshtymyn, – dedi ol.
Jany men táni názik kelinshektiń áli de armany asqaq. Ol – 3 jastan 18 jasqa deiingi barlyq múgedektigi bar balaqailarǵa arnalǵan úlken ortalyq ashý.
Jumysshy mamandyqtar jylyndaǵy keiipkerdiń biri Aijan Abraimova boldy. Oǵan Qonaev qalasy ákimdiginiń atynan tolaǵai tabys tileimiz jáne zor alǵysymyzdy bildiremiz. Biz – birge myqtymyz!
