Derekkóz: alashainasy.kz
«Eýraziia álemi» pikir-saiys klýbynyń qatysýshylary dál osy máseleni talqyǵa saldy. «Integratsiianyń qoǵamdyq diplomatiiasy» taqyrypta ótken jiynnyń shymyldyǵyn saiasattanýshy Edýard Poletaev túrdi. Onyń pikirinshe osy odaqtyń qazirgi jaǵdailar aiasyndaǵy mańyzyn túsindirýde meilinshe qoǵamǵa jaqyn bolý qajet. «Bul tarapta «qoǵamdyq diplomatiia» atty qalyptasqan terminniń ózi búgingi taqyryptyń aiasyn ashpaidy. «Mádeni diplomatiia», «halyqtyq diplomatiia», «azamattyq diplomatiia» atty túsinikterdi qaita paidalaný kerek», – dedi ol.
Al saiasattanýshy Marat Shibuttyń pikirinshe odaq aiasynda atqarylar isterdi qoǵamdyq tulǵalar, sarapshylar arqyly túsindirgen mańyzdy. «Qoǵamdyq diplomatiia» degenimiz osy. Bul resmi organdardyń málimdemelerine qaraǵanda halyqqa áldeqaida jaqyn», – dedi ol.
Óz kezeginde Qazaq-Nemis ýniversitetiniń janyndaǵy halyqaralyq jáne aimaqtyq áriptestik institýtynyń direktory Bolat Sultanovtyń aitýynsha dál qazirgi jaǵdaida halyqqa Eýraziialyq odaqtyń artyqshylyǵy men kemshiligin ashyp aitý kerek. «Bul mindetti «qoǵamdyq diplomatiianyń» ókilderine júktese, odaq aiasyndaǵy kóp kúmánniń bulty seiiler edi», – dedi óz sózinde Sultanov.
Al Qazaqstannyń Frantsiia men Shveitsariiadaǵy bir kezgi elshisi bolǵan Qazbek Beisebaev qoǵamdyq diplomatiiada jýrnalisterdiń róli zor ekenin tilge tiek etti. «Eýraziialyq odaqqa biriktik eken. Endeshe biraz dúnieniń basyn ashý kerek. Aitalyq, kózi ashyq, kókeregi oiaý qaýym qazirgi Ýkraindaǵy jaǵdaiǵa qarap Qazaqstannyń soltústik bóligine alańdaidy. Alaida biz ózimizdi jáne Ýkrainany salystyrýǵa tiisti emespiz. Negizinde bizdi biriktiretin qundylyqtar bar. Eki eldiń arasyna syzat túsirgenshe solardy kóbirek aitý kerek», – dedi ol.
Kezdesýdi túiindegen Lesia Qarataeva biraz nárseniń basyn ashyp aitty. Onyń pikirinshe, Qazaqstan men Reseidiń arasyna biz emes, teriskei kórshimizdiń radikaldy pikirdegi keibir saiasattanýshylary syzat túsirip otyr. «Olar integratsiiany ózderinshe «basqa qyrynan» túsindirmek bolady. «Kelmeske ketken keńestik dáýirdi tiriltemiz...» degendei pikir aitady. Qazaqstandyqtar buǵan qarsy», – dedi óz sózinde Qarataeva.
Avtor: Serik Jumabaev
