Áleýmettik jelide rezonans týdyryp júrgen Tanagóz Tolqynqyzy taǵy bir ótkir jazbasyn jariialap, qoǵamdaǵy qundylyqtar, ádiletsizdik jáne ulttyq sana máselesin kóterdi, dep habarlaidy Dala News.
Avtor jazbasyn «Biz nege baqytsyz ultpyz?» degen suraqpen bastap, eldegi moraldyq daǵdarysqa nazar aýdarady.
«Ókinishke qarai, bizde satylmaityn adam joq. Báriniń moinynda baǵasy jazylǵan birka tur. Bireýiniń quny – alyp júrgen jalaqysy, bireýiniń quny – bes kúndik kreslosy, bireýiniń quny – kásibi, bireýiniń quny – tender», – dep jazady ol.
Onyń pikirinshe, qoǵamda ar-uiat pen ózin-ózi qurmetteý álsiregen, al ózgeris jasaýǵa degen daiyndyq joq.
«Ózgeris sen ólýge daiyn bolǵanda keledi. Biraq eshkim ólgisi kelmeidi. Iaǵni ózgeris eshqashan kelmeidi degen sóz», – deidi avtor.
Sondai-aq ol tarihi tulǵalardy mysalǵa keltirip, ótken urpaqtyń kúresi men qazirgi qoǵamnyń aiyrmashylyǵyn kórsetedi. Atap aitqanda, Álihan Bókeihan, Ahmet Baitursynuly syndy qairatkerlerdiń qurbandyǵy eske alynady.
Avtor Mahatma Gandidiń ómir jolyna toqtalyp, onyń zorlyqsyz qarsylyq filosofiiasyn erekshe atap ótedi. Gandidiń «Satiagraha» qaǵidaty – aqiqat pen ádilet úshin beibit kúres júrgizý – búgingi qoǵamǵa úlgi retinde usynylady.
«Ol álemdi kúshpen emes, ar-ojdan arqyly jeńdi», – dep jazady avtor.
Tanagóz Tolqynqyzy qazirgi qoǵamda da sondai tabandylyq pen printsiptiń jetispeitinin aitady. Ásirese, qazaq tiliniń máselesine erekshe toqtalady.
«Al seniń uly joryǵyń – qazaq tilinde sóileý. Mahabbatpen sóileý. Tabandy túrde sóileý. Printsipti túrde sóileý. Sol tilde sóileýge imenbei, namystanbai sóileý», – deidi ol.
Avtordyń pikirinshe, ár adam ózgeristi ózinen bastaýy kerek, áitpese qoǵamdaǵy jaǵdai ózgermeidi.
Jeli qoldanýshylary bul jazbaǵa belsendi pikir bildirip, biri qoldaý kórsetse, endi biri avtordyń oiymen kelispeitinin jetkizgen. Degenmen jazba qoǵamdaǵy ózekti máselelerdi taǵy bir márte kún tártibine shyǵardy.
