Áleýmettik jeli qoldanýshylarynyń arasynda Nur-Múbarak ýnıversıtetiniń oqytýshysy Nurjan Smaǵulovtyń dárisi úlken daý týdyrdy, dep habarlaıdy Dalanews.kz.

Jelide taraǵan vıdeoda ustaz pedofılderge qatysty pikir bildirgen.

“Pedofıldiń bolýy Allanyń baryna dálel emes pe?! Qalaı oılaısyzdar? Kerisinshe, pedofılderdiń bolýy Allanyń baryna dálel bolmaýy kerek. Pedofıldiń bolýy – Allanyń bar ekenine dálel. Nege dep oılaısyzdar? Jigitter, eger Alla bolmasa, bizdiń qalaýymyz oryndalady. Bizdiń qalaýymyz pedofıldiń bolýy ma, bolmaýy ma? Onda bolmaıtyn edi. Biraq bizdiń qalaǵan nársemizdiń qarsysy bolyp tur ma? Bizdiń qalaýymyz oryndalyp tur ma, oryndalyp turǵan joq pa?”, – deıdi er adam.

Osy málimdemeden keıin kópshilik ustazdy aıyptaı bastady.

Máselege baılanysty Qazaqstan musylmandary dinı basqarmasy (QMDB) resmı túsinikteme berdi. Basqarmanyń habarlaýynsha, beınejazbada aıtylǵan pikir Nur-Múbarak ýnıversıtetiniń resmı ustanymyn bildirmeıdi.

“Atalǵan beınejazba konteksten úzip alynǵan. Tolyq mazmuny burmalanǵan túrde taratylǵan. Islam dini pedofılıa men ar-namysqa qol suǵýshylyqtyń barlyq túrine túbegeıli qarsy. Bul dinimizde aýyr kúná ári qylmys bolyp sanalady. Islam dini adam abyroıyn, ásirese balanyń quqyǵyn qorǵaýdy basty mindet etedi”, – delingen jaýapta.

Sonymen qatar olar ýnıversıtet tarapynan Nurjan Smaǵulovqa túsindirme jumystary júrgizilgenin atap ótti.

“Bolashaqta osyndaı túsinbeýshilikke jol bermeý úshin N.Smaǵulovka BAQ jáne áleýmettik jelilerdegi sóz jaýapkershiligi týraly eskertý berildi”, — dedi basqarma.