Qyzylorda oblysy Jańaqorǵan aýdanynda qamaýǵa alynǵan kópbalaly ana ári qoǵam belsendisi Sandýǵash Turlybekovanyń balalary anasyn bostandyqqa shyǵarý úshin Toqaevtan kómek suraidy, dep habarlaidy Dalanews.kz.
Atalmysh faktige qatysty Qyzylorda oblysy politsiia departamenti málimdeme jasady.
“Atalǵan derek boiynsha Qyzylorda oblysynyń politsiia departamenti qylmystyq is qozǵady. Qazir tergep-tekserý áreketteri júrip jatyr” dep qysqa qaiyrǵan vedomstvo Ulysmedia.kz joldaǵan saýalǵa.
Keiin belgili bolǵandai, kópbalaly jalǵyzbasty ana, belsendi 40 jastaǵy Sandýǵash Turlybekovaǵa "eki adamdy bopsalady" degen aiyp taǵylǵan.
Turlybekovanyń balalary aiypty moiyndamaitynyn, ustaýdy belsendiligimen bailanystyrǵanyn málimdep, memleket basshysy Toqaevtan kómek surady.
Eske salaiyq, 6 naýryz keshke osydan birneshe jyl buryn Qyzylorda oblysynyń eks-ákimi Gúlshara Ábdiqalyqovaǵa "hannyń qyzy" degen turǵyn ustalǵany málimdelgen bolatyn. Bul týraly áleýmettik jeli qoldanýshylarynyń biri jazǵan edi.
Belsendiniń týystary politsiia Turlybekovanyń turǵyn úiine tintý júrgizgenin aitady. Al Turlybekovanyń qyzy Shakizat Oljabai anasyn ustaýǵa "dálel jáne negiz joq" dep sanaidy.
"6 naýryz sińlimniń týǵan kúni edi. Úide sińlim, inim úsheýi bolǵan. Keshke 20 shaqty politsei úige kelip, esikti syndyrǵan. Osy kezde anam 3 jasar inimdi qushaqtap turǵan. Ana men balany aiyryp, inim men sińlimdi dalaǵa kúshtep shyǵarǵan. Anamdy 3 saǵat bir bólmege qamady da, aýdandyq politsiia bólimine alyp ketti. Advokatty 7 naýryz tústen keiin ǵana kirgizdi. Biz – bes balamyz. Ne isteý kerek, bilmeimiz. Inim “Mamamdy politsiia áketti” dep jylap júr. Ony qalai jubatarymyzdy bilmei otyrmyz. Anamnyń kinási joq, dálel joq. Menińshe, bul qoldan uiymdastyrylǵan is. Qazaqstanda belsendilerdi qamaý qalypty jaǵdaiǵa ainaldy. Qazaqstandyqtardan arasha suraimyn" deidi belsendiniń qyzy “Azattyqqa” bergen suhbatynda.
Qyzylorda oblystyq politsiia departamenti baspasóz qyzmetiniń habarlaýynsha, Turlybekova Qylmystyq kodekstiń "Qorqytyp alý" babymen kúdikke ilinip, tergeý izoliatoryna qamalǵan.
