قىزىلوردا وبلىسى جاڭاقورعان اۋدانىندا قاماۋعا الىنعان كوپبالالى انا ءارى قوعام بەلسەندىسى ساندۋعاش تۇرلىبەكوۆانىڭ بالالارى اناسىن بوستاندىققا شىعارۋ ءۇشىن توقايەۆتان كومەك سۇرايدى، دەپ حابارلايدى Dalanews.kz.
اتالمىش فاكتىگە قاتىستى قىزىلوردا وبلىسى پوليسيا دەپارتامەنتى مالىمدەمە جاسادى.
“اتالعان دەرەك بويىنشا قىزىلوردا وبلىسىنىڭ پوليسيا دەپارتامەنتى قىلمىستىق ءىس قوزعادى. ءقازىر تەرگەپ-تەكسەرۋ ارەكەتتەرى ءجۇرىپ جاتىر” دەپ قىسقا قايىرعان ۆەدومستۆو Ulysmedia.kz جولداعان ساۋالعا.
كەيىن بەلگىلى بولعانداي، كوپبالالى جالعىزباستى انا، بەلسەندى 40 جاستاعى ساندۋعاش تۇرلىبەكوۆاعا "ەكى ادامدى بوپسالادى" دەگەن ايىپ تاعىلعان.
تۇرلىبەكوۆانىڭ بالالارى ايىپتى مويىندامايتىنىن، ۇستاۋدى بەلسەندىلىگىمەن بايلانىستىرعانىن مالىمدەپ، مەملەكەت باسشىسى توقايەۆتان كومەك سۇرادى.
ەسكە سالايىق، 6 ناۋرىز كەشكە وسىدان بىرنەشە جىل بۇرىن قىزىلوردا وبلىسىنىڭ ەكس-اكىمى گۇلشارا ءابدىقالىقوۆاعا "حاننىڭ قىزى" دەگەن تۇرعىن ۇستالعانى مالىمدەلگەن بولاتىن. بۇل تۋرالى الەۋمەتتىك جەلى قولدانۋشىلارىنىڭ ءبىرى جازعان ەدى.
بەلسەندىنىڭ تۋىستارى پوليسيا تۇرلىبەكوۆانىڭ تۇرعىن ۇيىنە ءتىنتۋ جۇرگىزگەنىن ايتادى. ال تۇرلىبەكوۆانىڭ قىزى شاكيزات ولجاباي اناسىن ۇستاۋعا "دالەل جانە نەگىز جوق" دەپ سانايدى.
"6 ناۋرىز ءسىڭلىمنىڭ تۋعان كۇنى ەدى. ۇيدە ءسىڭلىم، ءىنىم ۇشەۋى بولعان. كەشكە 20 شاقتى پوليسەي ۇيگە كەلىپ، ەسىكتى سىندىرعان. وسى كەزدە انام 3 جاسار ءىنىمدى قۇشاقتاپ تۇرعان. انا مەن بالانى ايىرىپ، ءىنىم مەن ءسىڭلىمدى دالاعا كۇشتەپ شىعارعان. انامدى 3 ساعات ءبىر بولمەگە قامادى دا، اۋداندىق پوليسيا بولىمىنە الىپ كەتتى. ادۆوكاتتى 7 ناۋرىز تۇستەن كەيىن عانا كىرگىزدى. ءبىز – بەس بالامىز. نە ىستەۋ كەرەك، بىلمەيمىز. ءىنىم “مامامدى پوليسيا اكەتتى” دەپ جىلاپ ءجۇر. ونى قالاي جۇباتارىمىزدى بىلمەي وتىرمىز. انامنىڭ كىناسى جوق، دالەل جوق. مەنىڭشە، بۇل قولدان ۇيىمداستىرىلعان ءىس. قازاقستاندا بەلسەندىلەردى قاماۋ قالىپتى جاعدايعا اينالدى. قازاقستاندىقتاردان اراشا سۇرايمىن" دەيدى بەلسەندىنىڭ قىزى “ازاتتىققا” بەرگەن سۇحباتىندا.
قىزىلوردا وبلىستىق پوليسيا دەپارتامەنتى باسپا ءسوز قىزمەتىنىڭ حابارلاۋىنشا، تۇرلىبەكوۆا قىلمىستىق كودەكستىڭ "قورقىتىپ الۋ" بابىمەن كۇدىككە ءىلىنىپ، تەرگەۋ يزولياتورىنا قامالعان.
