Aqiqatqa týra qarap aitar bolsaq, Qazaqstanǵa tynyshtyq kerek. Óitkeni biz az halyqpyz. Biraq jerimiz úlken. Halyqty asyraityn jerdiń astynda da, ústinde de bailyq jetkilikti. Sondyqtan «saiasatta, bilikte ózgeris kerek, reforma kerek» dep «urandap» jurtty tóńkeriske shaqyrýdyń qajeti joq.
Odan utarymyz shamaly. Barymyzdan airylyp qalamyz. Syrtqy kúshter aralasyp, búgingi kúnge zar bolyp qalarymyz haq. Óitkeni syrtqa kúshter memleketimizdiń shańyraǵyn shaiqaltý úshin qarjy tógip, talaidy satyp alýy múmkin.
Alysqa barmai – aq TMD keńistiginde bolyp jatqan saiasi oqiǵalarǵa kóz salar bolsaq, sonyń ózi bizge sabaq bolýy tiis. Iaǵni bizge qazirgi júieni ózgertý úshin revoliýtsiia emes, evoliýtsiia qajet.
Bári oryn-ornymen bolǵany jón. Onda da halyq kez kelgenniń artynan emes, eldiń, memlekettiń, ulttyń qamyn oilaityn jany taza, adal tulǵanyń mańaiyna uiyp, sonyń mańyna toptasýy tiis dep oilaimyn.
Óitkeni halyqtyń aýzy kúidi. Byltyr Qosanovqa eremiz dep bir aldandy. Qazir Frantsiiada otyryp alyp, eldi bilikke aitaqtap otyrǵan taǵy bireý bar. Oǵanda senýge bolmaidy. Myqty bolsa bilikte júrgende halyqtyń qamyn nege oilamady?
Demek, Qazaqstannyń saiasi alańyna jańa serkeler shyǵýy tiis. Máselen, biz ekologiialyq partiia qurý jolyndamyz. Maqsat belgili. Halyqtyń sózin sóileý. Qamyn jeý. Memlekettiń iesi qazaq ekenin ózgelerge moiyndatý.
Qazaqtyń tilin osy jerdi mekendeitin barlyq ulttyń ortaq tili etý.
Bizdiń partiianyń alǵa qoiǵan maqsaty osy.
Árine, qazir bizdi qoldaýshylar azdaý. Biraq oǵan bola jumysymyzdy joldan doǵara almaimyz. Qurǵaq ýáde, ádemi sóz emes, naqty is-áreket arqyly ózimizdi ózgege tanytamyz. Moiyndatamyz.
Biz jasaǵan naqty jumysty kórgen soń – aq halyq bizdiń artymyzdan erýi tiis. Osydan birer ai buryn bir tanysym «Azeke sen millionersiń ǵoi. Bir million (dollarmen) ber, bir oblysty ápereiik» deidi. «Peiilińe rahmet, men ákim bolǵym kelmeidi.
Oryntaq úshin jumsaityn ol milliondy men partiia qurýǵa, odan ary halyqpen jumys isteýge arnaǵanym tiimdi. Men sol joldy tańdaǵan adammyn» dep jaýap berdim.
Egerde men bilikte bolǵym kelse, oǵan baiaǵyda qol jetkizer edim. Biraq men tańdaǵan jol basqa. Halyqpen birge bolý. Ulttyń qamyn jeý. Memlekettiń bolashaǵyn oilaý. Táýelsizdikti baiandy etý. Mine osy. Men alǵa qoiǵan osy maqsattarǵa jetý úshin, partiia quryp, sol arqyly qol jetkizýdi jón kórdim.
