Májilis depýtaty Edil Jańbyrshin elde LGBT-ny nasihattaýǵa tyiym salýdy usynyp, saýalyn premer-ministrge jáne Ulttyq qaýipsizdik komitetiniń tóraǵasyna joldady, - dep habarlaidy Dalanews.kz.
"Keshe ǵana álemdik saiasatta eleýli oryn alyp, búkil halyqaralyq qaýymdastyqty ózine qaratqan AQSh prezidentiniń resmi ulyqtaý rásimi ótti. Osy kúnge deiin álemniń kóptegen elinde adam quqyǵyn qorǵaý, liberaldyq kózqarasty qalyptastyrý men azamattyq qoǵam ornatýdy kózdegen qurama shtattarda 47-prezident Donald Tramp budan bylai eki jynysty bekitti. Iaǵni AQSh-ta er men áiel jynysy zańmen shegelendi" - dedi ol.
Jańbyrshinniń aitýynsha, "bul - LGBT-ǵa, iaǵni tabiǵi jaratylysqa qarsy jynoinaq toptarǵa Qazaqstan túgili, endi AQSh-ta zańmen tyiym salynady degen sóz".
"Bul jańalyq Batysty ózderine qorǵaýshy sanap júrgen qyztekelerge tóbelerinen jai túskendei bolǵany anyq. Osy tusta barlyq qyztekelerge "Diadia Donaldtan" jalyndy sálem!" - dedi depýtat.
Onyń sózinshe, AQSh prezidentiniń sheshimi Májilis depýtattarynyń LGBT-ǵa qarsy ustanymymen ushtasyp otyr.
"Májiliske kelgeli beri ultymyzdyń bolashaǵyna balta shaýyp júrgen azǵyn jolmen kúresip kele jatyrmyz. Men biletin Úkimetke keminde birneshe naqty depýtattyq saýal joldandy. Oǵan qosa LGBT-ny nasihattaýǵa tyiym salýdy kózdeitin arnaiy zań normalaryn da ázirledik. Alaida osy áreketterimizge keibir sheneýnikter batys elderi ókilderiniń "demokratiiany shektep jatyrsyńdar", "adam quqyǵyn taptap jatyrsyńdar" degen ustanymdaryn jeleý qylyp, qarsylyq bildirdi. Tipti LGBT ókilderi jáne olardyń sybailastary depýtat áriptesterime jáne olardyń otbasylaryna áleýmettik jelide, buqaralyq aqparat quraldarynda jappai aqparattyq shabýyldar uiymdastyrdy. Biraq bul kúreste biz jalǵyz qalǵan joqpyz", - dedi ol.
Depýtat E-petition.kz memlekettik platformasynda LGBT nasihatyna qarsy petitsiia jariialanǵanyn, nebári 2 aptada petitsiia 50 myń qol jinaǵanyn aitty.
"Bul ulttyq bolmysymyzǵa jat LGBT aǵymyna halyqtyń ashyq qarsy ekenin kórsetti. Al Parlament birinshi kezekte halyqtyń múddesin eskerip, ony naqty zańnamamen iske asyrýǵa tiis", - dedi Jańbyrshin.
