Búgin oblys ákimi Nurlybek Nálibaev, Densaýlyq saqtaý ministri Aqmaral Álnazarova, Parlament Májilisiniń depýtattary Murat Ábenov, Marhabat Jaiymbetov, Murat Ergeshbaev bir aýysymda 100 kelýshini qabyldaityn emhanasy bar 300 tósektik kópbeiindi aýrýhananyń (onkologiialyq bólimshesimen) qurylys alańyna baryp, jumys barysymen tanysty, dep habarlaidy Dalanews.kz
Oblys turǵyndary úshin asa mańyzdy áleýmettik nysan Memleket basshysynyń tapsyrmasymen salynýda. Aýrýhana zamanaýi tehnikalyq sheshimderdi eskerip jobalanǵan, eń ozyq tehnologiiamen qamtamasyz etiledi. Diagnostika jáne emdeý boiynsha zamanaýi standarttarǵa sai keletin joǵary tehnologiialyq innovatsiialar engiziledi, bul meditsinalyq kómektiń sapasy men qoljetimdiligin arttyrady. Osylaisha Qyzylordada sheteldik klinikalardan esh kem túspeitin zamanaýi meditsinalyq keshen paida bolady.
«Meliorator» seriktestigi qolǵa alǵan jobaǵa 36 mlrd 416 mln teńge qarjy qaralǵan. Bul – aimaqtaǵy halyqaralyq standarttarǵa sai, eń aýqymdy jobalardyń biri. Aýmaǵy 57 myń sharshy metr, 7 gektar jerge ornalasqan. Nysan 10 bloktan turady: emhana, pansionat, konferents-zal, ashana, fizioterapiia, qabyldaý bólimi, ákimshilik, reanimatsiia, himioterapiia jáne radioterapiia, operatsiialyq bólim.
Qurylysy eki jyl buryn bastalǵan ǵimaratty salý barysynda osy ýaqytqa deiin 21 mlrd. teńge qarajat igerilip, jumystyń 70 paiyzy eńserildi. Qalǵan 16 mlrd. teńge osy jyly respýblikalyq jáne oblystyq biýdjetten bólingen. Qazirgi tańda beton jumystary tolyq bitken, al kirpish qalaý aiaqtalyp qaldy.
Jaqyn arada qurylysshylar terezesin salyp, qasbetin bastaidy. Sonymen qatar, jylý qubyrlary ornatylyp, qajetti toraptarǵa qosylýda. Elektr jelisi tartylyp, taratý núkteleri daiyndaldy. Qurylys kestege sáikes júrgizilýde. Jospar boiynsha kúsheitilgen jumys rejimine kóship, jyl sońyna deiin qural-jabdyqtaryn ornatyp, paidalanýǵa beredi.
Búginde qurylys basynda 200-ge jýyq adam, 15 tehnika bar. Gazoblog, injenerlik júielerge qajetti materialdar jetkilikti.
Aita keteiik, Memleket basshysynyń tapsyrmasyna sáikes 12 oblysta zamanaýi perinataldyq ortalyqtar salý kózdelgen. Búgin Qyzylorda qalasynda halyqaralyq tájiribe men ozyq meditsinalyq tehnologiialar engiziletin 200 tósektik perinataldyq ortalyqtyń irgetasy qalandy. Nysanǵa 2,7 gektar jer telimi bólinip, 48,8 mlrd teńge qarajat qaralǵan.
