Búgin Qyzylorda oblysynyń ákimi Nurlybek Nálibaevtyń tóraǵalyǵymen Konstıtýsıalyq reformalar jónindegi óńirlik aktıv otyrysy ótti, dep habarlaıdy Dalanews.kz
Oǵan máslıhat depýtattary, quqyq qorǵaý organdarynyń, basqarmalar men aýmaqtyq departamentterdiń basshylary, qoǵamdyq keńestiń músheleri, zıaly qaýym, buqaralyq aqparat quraldarynyń ókilderi qatysty.
Memleket basshysynyń bastamasymen elimizde jańa Ata Zańnyń jobasy ázirlendi. Osy maqsatta 130 adamnan turatyn Konstıtýsıalyq komısıa quryldy. Bir aptaǵa jýyq jumys jasaǵan komısıa jeke azamattardan, saıası partıalardan, qoǵamdyq uıymdar men sarapshylardan túsken usynystardy egjeı-tegjeıli taldady.
Ashyq qoǵamdyq talqylaýlardyń, jańa normalar men erejelerdi jan-jaqty ári tıanaqty pysyqtaýdyń nátıjesinde Ata zańnyń jańa jobasy ázirlenip, buqaralyq aqparat quraldarynda jarıalandy. Aımaq basshysy jańa Konstıtýsıa jobasynyń mańyzdylyǵyna toqtalyp, Syr óńiri jurtshylyǵyn bul bastamaǵa joǵary jaýapkershilikpen, belsendi atsalysýǵa shaqyrdy.
«Memleket basshymyz Qasym-Jomart Kemeluly 2025 jylǵy 8 qyrkúıekte halyqqa arnaǵan Joldaýynda Qazaqstanda bir palataly Parlament qurý jóninde bastama kóterdi. Bul usynys Konstıtýsıalyq reformany júzege asyrýǵa negiz bolyp, Parlamenttik reforma jónindegi arnaıy Jumys toby quryldy. Qazan aıynan beri elimizdegi saıası partıalardan, sarapshylardan, saıası-qoǵamdyq ınstıtýttardan, úkimettik emes uıymdardan, azamattarymyzdan Parlamenttik reformaǵa qatysty usynystar jınaqtaldy. Memleket basshymyz Syr óńirinde ótken
Ulttyq quryltaıdyń qorytyndy besinshi otyrysynda Jumys tobynyń usynystaryn negizge ala otyryp, Qazaqstannyń aldaǵy saıası baǵyt-baǵdaryn aıqyndap berdi.
Prezıdentimiz Quryltaıda elimizdegi buǵan deıingi aýqymdy saıası reformalarynyń jalǵasy retinde Konstıtýsıalyq reformaǵa qatysty óz ustanymdaryn jetkizdi. El tarıhyndaǵy mańyzdy sheshimderdi usyndy.
Jańa Ata Zańnyń jobasyndaǵy birqatar baptar men bólimderdiń mazmuny tutas konstıtýsıalyq modeldi aıtarlyqtaı jańǵyrtýǵa, saıası-qoǵamdyq ınstıtýttardy jetildirýge, azamattardyń quqyqtary men bostandyqtaryn qorǵaý tetikterin kúsheıtýge negiz bolady. Bul – el tarıhyndaǵy mańyzdy ári taǵdyrly qadam bolmaq», – dedi N.Nálibaev.
Jıynda QR Parlamenti Senatynyń janyndaǵy Senatorlar keńesiniń múshesi, Qyzylorda oblysynyń qurmetti azamattary Bekmyrza Qaıypuly men Murat Baqtıaruly, oblys prokýrory Rızabek Kárimuly, oblystyq máslıhattyń tóraǵasy, Konstıtýsıalyq komısıanyń múshesi Murat Jolkeldiuly, Qazaqstannyń Eńbek Eri, Konstıtýsıalyq komısıanyń múshesi Imamzada Qýanyshbaıuly óz usynys-pikirlerin bildirdi.
