Qyzylorda oblysynda qaitarylǵan aktivter esebinen 7 mlrd teńgege jańa meditsinalyq mekemeler salynady, dep habarlaidy Dalanews.kz.
Arnaiy memlekettik qorǵa qaitarylǵan qarajat Aral, Qazaly, Shieli jáne Jańaqorǵan aýdandaryndaǵy ortalyq aýdandyq aýrýhanalar janynan jańa korpýstar salýǵa baǵyttalǵan. Bul jańa nysandarda insýlttik ortalyqtar men rentgenhirýrgiia bólimsheleri sekildi beiindi bólimder ashylyp, magnittik-rezonanstyq tomografiia, kompiýterlik tomografiia jáne angiografiialyq qurylǵylar sekildi zamanaýi meditsinalyq jabdyqtar ornatylady.
“Jobalardy júzege asyrý aýyldyq jerlerde turatyn 300 myńnan astam adamdy arnaiy meditsinalyq kómekpen qamtamasyz etýge múmkindik beredi”, – dep málimdedi Úkimet.
Nysandardy biyl paidalanýǵa berý josparlanyp otyr.
Aita keteiik, kúni keshe Jambyl oblysy Merki jáne Talas aýdandaryndaǵy aýdanaralyq kópsalaly ortalyq aýrýhanalardy qaita jóndeýge Arnaiy memlekettik qordan 2,4 milliard teńge baǵyttalǵany habarlanǵan edi.
Bul qarjynyń basym bóligi 2,3 mlrd teńgesi Talas aýdandyq kópsalaly ortalyq aýrýhanasyn kúrdeli jóndeýge jumsalady.
Al Merki aýdandyq kópsalaly ortalyq aýrýhanasynyń qabyldaý bólimin jóndeýge 144,9 mln teńge qarastyrylǵan. Qurylys jumystary aiaqtalýǵa jaqyn. Nysandy jyl sońyna deiin paidalanýǵa berý josparlanyp otyr.
Jalpy, 2025 jyly Jambyl oblysyndaǵy densaýlyq saqtaý salasynyń tórt nysanyn damytýǵa Arnaiy memlekettik qordan 2,8 mlrd teńge bólingen.
Buǵan deiin zańsyz shetelge shyǵarylǵan aktivterdi elge qaitarý esebinen Qordai jáne Talas aýdandarynda eki dárigerlik ambýlatoriianyń qurylysy bastalǵany habarlanǵan. Árbir ambýlatoriia kúnine 45 adamdy qabyldai alady.
Sondai-aq jýyrda Arnasai aýylynda elimizde alǵash ret korrýptsionerlerden qaitarylǵan qarjyǵa salynǵan jańa dárigerlik ambýlatoriia paidalanýǵa berildi.
