قىزىلوردا وبلىسىندا قايتارىلعان اكتيۆتەر ەسەبىنەن 7 ملرد تەڭگەگە جاڭا مەديسينالىق مەكەمەلەر سالىنادى، دەپ حابارلايدى Dalanews.kz.

ارنايى مەملەكەتتىك قورعا قايتارىلعان قاراجات ارال، قازالى، شيەلى جانە جاڭاقورعان اۋداندارىنداعى ورتالىق اۋداندىق اۋرۋحانالار جانىنان جاڭا كورپۋستار سالۋعا باعىتتالعان. بۇل جاڭا نىسانداردا ينسۋلتتىك ورتالىقتار مەن رەنتگەنحيرۋرگيا بولىمشەلەرى سەكىلدى بەيىندى بولىمدەر اشىلىپ، ماگنيتتىك-رەزونانستىق توموگرافيا، كومپيۋتەرلىك توموگرافيا جانە انگيوگرافيالىق قۇرىلعىلار سەكىلدى زاماناۋي مەديسينالىق جابدىقتار ورناتىلادى.

“جوبالاردى جۇزەگە اسىرۋ اۋىلدىق جەرلەردە تۇراتىن 300 مىڭنان استام ادامدى ارنايى مەديسينالىق كومەكپەن قامتاماسىز ەتۋگە مۇمكىندىك بەرەدى”، – دەپ مالىمدەدى ۇكىمەت.

نىسانداردى بيىل پايدالانۋعا بەرۋ جوسپارلانىپ وتىر.

ايتا كەتەيىك، كۇنى كەشە جامبىل وبلىسى مەركى جانە تالاس اۋداندارىنداعى اۋدانارالىق كوپسالالى ورتالىق اۋرۋحانالاردى قايتا جوندەۋگە ارنايى مەملەكەتتىك قوردان 2،4 ميلليارد تەڭگە باعىتتالعانى حابارلانعان ەدى.

بۇل قارجىنىڭ باسىم بولىگى 2،3 ملرد تەڭگەسى تالاس اۋداندىق كوپسالالى ورتالىق اۋرۋحاناسىن كۇردەلى جوندەۋگە جۇمسالادى.

ال مەركى اۋداندىق كوپسالالى ورتالىق اۋرۋحاناسىنىڭ قابىلداۋ ءبولىمىن جوندەۋگە 144،9 ملن تەڭگە قاراستىرىلعان. قۇرىلىس جۇمىستارى اياقتالۋعا جاقىن. نىساندى جىل سوڭىنا دەيىن پايدالانۋعا بەرۋ جوسپارلانىپ وتىر.

جالپى، 2025 جىلى جامبىل وبلىسىنداعى دەنساۋلىق ساقتاۋ سالاسىنىڭ ءتورت نىسانىن دامىتۋعا ارنايى مەملەكەتتىك قوردان 2،8 ملرد تەڭگە بولىنگەن.

بۇعان دەيىن زاڭسىز شەتەلگە شىعارىلعان اكتيۆتەردى ەلگە قايتارۋ ەسەبىنەن قورداي جانە تالاس اۋداندارىندا ەكى دارىگەرلىك امبۋلاتوريانىڭ قۇرىلىسى باستالعانى حابارلانعان. ءاربىر امبۋلاتوريا كۇنىنە 45 ادامدى قابىلداي الادى.

سونداي-اق جۋىردا ارناساي اۋىلىندا ەلىمىزدە العاش رەت كوررۋپسيونەرلەردەن قايتارىلعان قارجىعا سالىنعان جاڭا دارىگەرلىك امبۋلاتوريا پايدالانۋعا بەرىلدى.