Oblys ákimi Nurlybek Nálibaev jańadan salynatyn kitaphana men drama teatrdyń qurylys alańyna bardy.
Memleket basshysy Ulttyq quryltaidyń besinshi otyrysynda Qyzylorda qalasynda jańa drama teatr jáne táýlik boiy jumys isteitin kitaphana salý týraly aitqan bolatyn, dep habarlaidy Dalanews.kz.
«Qyzylordada jańa drama teatr salý josparymyzda bar, biyl qurylysty bastaýymyz kerek. Ótken saparymda oblystyń ziialy qaýym ókilderimen kezdesken kezde zamanaýi kitaphana salý kerek dep aittym. Endi bul qurylys biyldan bastap júrgiziledi», – dedi Qasym-Jomart Kemeluly óz sózinde.
Zamanaýi, kópfýnktsionaldy kitaphana salýǵa investor esebinen 20 mlrd. teńge qaralǵan. Bul elimizdegi kitaphana infraqurylymyn damytýǵa, oqyrmandarǵa qoljetimdilikti arttyrýǵa jáne óńirlerde aqparattyq mádeniet deńgeiin kóterýge baǵyttalǵan.
Joba boiynsha ǵimarattyń aýmaǵy 13 000 sharshy metr, 1 millionnan astam kitap qoryn saqtaýǵa arnalǵan. Jyl saiyn 250-300 myń oqyrmanǵa qyzmet kórsetedi. Katalogtar, zamanaýi ashyq formattaǵy oqý zaldary, 50 adamnyń tsifrlyq resýrstarmen jumys isteýine qolaily elektrondy bólme qarastyrylady. Innovatsiialyq baǵyttaǵy media-lab bólmesi men podkast stýdiiasy bolady. Bul bastama – halyqtyń bilimge, mádenietke jáne zamanaýi aqparat kózderine qoljetimdiligin arttyrtyn mańyzdy qadam.
Al drama teatrdyń jańa ǵimaratynyń salynýy – qazaq teatr óneriniń qarashańyraǵy sanalatyn aimaqtaǵy turaqty kórermender úshin zor qýanysh, úlken syi. N.Bekejanov atyndaǵy oblystyq drama teatr byltyr bir jyldyń ishinde tórt birdei halyqaralyq festivalda top jardy. Materialdyq bazasy barynsha nyǵaiyp, mamandardyń kásibi turǵyda jetilýine jaǵdai jasaldy, baspanamen qamtamasyz etildi.
Jańa ǵimarat artisterdiń daiyndyǵyna, túrli sahnalyq kórinister men aýqymdy dekoratsiialar qurýǵa múmkindik beredi, keń tynysty dybys júiesi men sońǵy úlgidegi jabdyqtar qoiylym sapasyn arttyra túsedi.
