Qyzylorda oblysynyń ákimi Nurlybek Nálibaev bastaǵan delegatsiianyń Qytai Halyq Respýblikasyna jumys sapary Ninsia-Hýei avtonomdyq aýdanynyń Inchýan qalasynda jalǵasty. Aimaq basshysy kúrish ósirý jáne óndirýmen ainalysatyn «Ningxia Guangyin Rice Industry Co., Ltd.», aýyl sharýashylyǵy salasyndaǵy «Ningxia State Farm» kompaniialarynyń jetekshilerimen kezdesip, aimaqtyń áleýetine sai investitsiia tartý máselelerin talqylady,- dep habarlaidy Dalanews.kz
«Qyzylorda oblysy – Qazaqstandaǵy kúrish óndirýshi iri óńir. Oblysta barlyq qazaqstandyq kúrish pen tuzdyń 90%-dan astamy óndiriledi. Biz ishki naryqty tolyǵymen qamtamasyz etemiz, sondai-aq, ónimdi alys jáne jaqyn shetelderge belsendi túrde eksporttaimyz. Jyl saiyn 80 myń gektardan astam jerge kúrish egemiz.
Ótken jyldyń qorytyndysymen 500 myń tonna kúrish jinalyp, 73,2 myń tonnasy eksporttaldy. Budan bólek, dándi, maily daqyldardyń, jem-shóp, kartop, kókónis, baqsha daqyldarynyń egistik alqaptary bar.
Óńirde 700-ge jýyq sharýa qojalyǵynda 15 túrli kúrish sorty ósiriledi. Al, kúrish óńdeitin 40 kompaniia ǵana bar. Negizgi aýyl sharýashylyǵy ónimi kúrish bolǵandyqtan, biz ony tereń óńdeý salasyna qyzyǵýshylyq tanytamyz.
Sizderdiń kompaniialaryńyzdyń mol tájiribesin eskerip, Qyzylorda oblysyna birlesip jumys jasaýǵa shaqyramyz. Seriktes qajet bolǵan jaǵdaida, óńirde óz salalaryn damytqan tájiribeli kásipkerler bar. Oblys ákimdigi jer telimin berýge, injenerlik infraqurylym jetkizýge, óndirilgen ónimdi satýǵa, jan-jaqty qoldaýǵa daiyn», – dedi N. Nálibaev.
Kezdesýde oblys ákimi atalǵan kompaniia basshylaryn óńirdiń áleýetimen jaqynyraq tanysý úshin arnaiy issaparmen kelýge shaqyrdy.
