قىزىلوردا وبلىسىنىڭ اكىمى نۇرلىبەك نالىبايەۆ باستاعان دەلەگاسيانىڭ جۇڭگو حالىق رەسپۋبليكاسىنا جۇمىس ساپارى نينسيا-حۋەي اۆتونومدىق اۋدانىنىڭ ينچۋان قالاسىندا جالعاستى. ايماق باسشىسى كۇرىش ءوسىرۋ جانە وندىرۋمەن اينالىساتىن «Ningxia Guangyin Rice Industry Co.، Ltd.»، اۋىل شارۋاشىلىعى سالاسىنداعى «Ningxia State Farm» كومپانيالارىنىڭ جەتەكشىلەرىمەن كەزدەسىپ، ايماقتىڭ الەۋەتىنە ساي ينۆەستيسيا تارتۋ ماسەلەلەرىن تالقىلادى،- دەپ حابارلايدى Dalanews.kz
«قىزىلوردا وبلىسى – قازاقستانداعى كۇرىش ءوندىرۋشى ءىرى ءوڭىر. وبلىستا بارلىق قازاقستاندىق كۇرىش پەن تۇزدىڭ 90%-دان استامى وندىرىلەدى. ءبىز ىشكى نارىقتى تولىعىمەن قامتاماسىز ەتەمىز، سونداي-اق، ءونىمدى الىس جانە جاقىن شەتەلدەرگە بەلسەندى تۇردە ەكسپورتتايمىز. جىل سايىن 80 مىڭ گەكتاردان استام جەرگە كۇرىش ەگەمىز.
وتكەن جىلدىڭ قورىتىندىسىمەن 500 مىڭ توننا كۇرىش جينالىپ، 73،2 مىڭ تونناسى ەكسپورتتالدى. بۇدان بولەك، ءداندى، مايلى داقىلداردىڭ، جەم-شوپ، كارتوپ، كوكونىس، باقشا داقىلدارىنىڭ ەگىستىك القاپتارى بار.
وڭىردە 700-گە جۋىق شارۋا قوجالىعىندا 15 ءتۇرلى كۇرىش سورتى وسىرىلەدى. ال، كۇرىش وڭدەيتىن 40 كومپانيا عانا بار. نەگىزگى اۋىل شارۋاشىلىعى ءونىمى كۇرىش بولعاندىقتان، ءبىز ونى تەرەڭ وڭدەۋ سالاسىنا قىزىعۋشىلىق تانىتامىز.
سىزدەردىڭ كومپانيالارىڭىزدىڭ مول تاجىريبەسىن ەسكەرىپ، قىزىلوردا وبلىسىنا بىرلەسىپ جۇمىس جاساۋعا شاقىرامىز. سەرىكتەس قاجەت بولعان جاعدايدا، وڭىردە ءوز سالالارىن دامىتقان تاجىريبەلى كاسىپكەرلەر بار. وبلىس اكىمدىگى جەر تەلىمىن بەرۋگە، ينجەنەرلىك ينفراقۇرىلىم جەتكىزۋگە، وندىرىلگەن ءونىمدى ساتۋعا، جان-جاقتى قولداۋعا دايىن»، – دەدى ن. نالىبايەۆ.
كەزدەسۋدە وبلىس اكىمى اتالعان كومپانيا باسشىلارىن ءوڭىردىڭ الەۋەتىمەن جاقىنىراق تانىسۋ ءۇشىن ارنايى ىسساپارمەن كەلۋگە شاقىردى.
