Búgin QR Premer-ministri Oljas Bektenovtiń tóraǵalyǵymen respýblikalyq keńes ótti. Kún tártibinde sý tasqynynyń aldyn alý sharalary talqylandy. Jiynǵa oblys ákimi Nurlybek Nálibaev selektorlyq rejim arqyly qatysyp, aimaqtaǵy sý sharýashylyǵynyń jaǵdaiyn, sý tasqynynyń aldyn alý jumystary týraly baiandady, – dep habarlaidy Dalanews.kz Qyzylorda oblysy ákiminiń baspasóz qyzmetine silteme jasap.
Qazirgi tańda Shardara sý qoimasynan Syrdariia ózeniniń tómengi aǵysyna sekýndyna 650 tekshe metr sý jiberilse, onyń 150 tekshe metrin Kóksarai sý rettegishi alady. Oblys aýmaǵyna sekýndyna 469 tekshe metr sý kelip túsýde (12.02.2024 jyly sekýndyna 242 tekshe metr).
2024-2025 jyldardaǵy qysqy-kóktemgi kezeńde Syrdariia ózeninen úlken kólemdegi sýdy qaýipsiz ótkizý jospary» bekitildi. Sý deńgeiin tómendetý úshin magistraldy kanaldar men kólderdiń sý alý kestesi ázirlendi. Muzdan tazarǵan soń sekýndyna 1 000 tekshe metrge deiin sý qabyldaýǵa bolady.
– Sý basý qaýpi bar 29 aimaqqa arnaiy tehnika, kúsh-quraldary jetkilikti 135 jaýapty mekeme bekitildi. Olarda 410 arnaiy tehnika jáne 1 234 adam kúshi bar. Sý tasqynyna qarsy qoldanylatyn 129,7 tonna janarmai, 95 110 dana qap jáne basqa da materialdar qory tolyq jasaqtalǵan. 61 evakýatsiialyq jinaqtaý jáne 71 qabyldaý pýnkti bar. Oblys aýmaǵyndaǵy sý sharýashylyǵynyń jaǵdaiy turaqty baqylaýda, qaýip joq, – dedi Nurlybek Nálibaev.
Aita ketý kerek, tiisti sala mamandary («Qazgidromet» jáne «Qazsýshar» RMK Qyzylorda filialdary) Syrdariia ózeni arnasyndaǵy 10 beket men 4 toraptaǵy sý deńgeiine kúndelikti monitoring júrgizedi. Jergilikti atqarýshy organdar men sý sharýashylyǵy mamandary táýlik boiy kezekshilikte.
Arnaiy mamandandyrylǵan mekememen muz jarý boiynsha da kelisim-shart jasalǵan. Ótken jyly 3 nysandaǵy qorǵanys bógetterin jóndeý-qalpyna keltirýge oblystyq biýdjetten qarjy bólindi, biýdjetten tys kózder esebinen 20 nysanda da osyndai jumystar atqaryldy.
Oblys aýmaǵynda 37 gidrotehnikalyq qurylys bar, kommýnaldyq menshiktegi 3 sý qoimasyna tekserý júrgizilip, qaýipsizdik deklaratsiiasy rásimdeldi. Biylǵy kúrdeli jóndeý jumystaryna qarjy qarastyrylýda.
