Shara barysynda elimizdiń ár tarabynan kelgen bilikti mamandar Taıynsha aýdanyna at basyn burdy.
Meımandar osynda ornalasqan «BioOperations» zaýytyna bas suǵyp, kásiporyn óndiretin ónimderdi kózben kórdi. Qonaqtardy zaýyt dırektory Evgenıı Kelın qarsy alyp, kásiporynnyń tarıhymen tanystyrdy.
Onyń atap ótkenindeı kompanıa bıylǵy jyly 6,5 myń kýbometr etanoldy Rotterdamǵa jóneltken. Batystaǵy bıojanarmaıdy óndeıtin ári óndiretin satyp alýshylarmen bir jyl boıy kelissóz júrgen. Sonyń nátıjesinje qazaqstandyq kompanıa Belgıadan klıent taýyp, bıylǵy jyldyń mamyr aıyn janarmaı toly eki kemeni Baltyq teńiziniń porttaryna jóneltipti.
Budan bólek zaýyt Úndistan, Norvegıa, AQSH jáne TMD-nyń birqatar elderine glúten men krahmal tasymaldaýda. Al Aýǵanstanǵa un jiberip otyr. Kúni keshe kompanıa basshylyǵy Ulybrıtanıamen áriptestik týraly kelisimge qol qoıǵan.
– Batys elderi taýardyń ekologıalyq jaǵynan taza jáne sapaly bolýyna mán beredi. Biz Eýropadan arnaıy ókilder kelip, zaýyttyń jumysymen tikeleı tanysqan bolatyn. Ulybrıtanıaǵa tasymaldaıtyn taýar kólemin ázir ashyp aıta almaımyz, bul komersıalyq qupıa. Belgilisi, bizdiń ónimder premýım-sapanyń sanatyna kiredi, onyń ishinde krahmal, glúten jáne etanoldy atap aıtýǵa bolady", – deıdi zaýyt basshysy.
«BioOperations» zaýytyna Qazaqstan turmaq TMD keńistiginde teń keler balama joq. Kásiporyn táýligine 70 kýb etanol óndiredi.
"Qazynaly Qyzyljar dalasy" sletiniń qatysýshylary budan keıin osy aýdanda ornalasqan«Emc-agro» et kombınatyna bardy. Kompanıa et óńdeýmen, shujyq ónimderin ázirleýmen aınalysady. Jyl basynan zaýyttyń shujyq sanatyndaǵy ónimderi kúrt ónim, bir aıdaǵy kórsetkshi 16 tonnaǵa jetken. Aı saıyn 5 myńnan asa iri-qara soıylyp, bulardan daıyn ónim ázirlenedi.
