Almaty oblysynda Qyzylaǵashtaǵy sý tasqynynan qaza bolǵandarǵa qoıylǵan eskertkish qalpyna keltirildi.
Qyzylaǵash qurbandaryna arnalǵan memorıal 2010 jylǵy tótenshe oqıǵadan soń oblys ákimi Amandyq Batalovtyń bastamasymen ornatylǵan.
Eskertkishtiń bıiktigi 7, eni 14 metr. Onda aǵashtan ustap, óz balasyn qutqaryp turǵan ana beınelengen.
Budan buryn jelide eskertkishtiń keteýi ketip, tozyǵy shyǵýǵa shaq qalǵanyn áshkerelegen málimetter jarıalandy.
Memorıaldyń irgesi irip, qabyrǵalaryn qaptaǵan japsyrmalar sógile bastaǵan bastaǵan, al aınaladaǵy tal-terek kútimniń joqtyǵynan qýrap ketken.
Eskertkishtiń estetıkalyq keıpin buzbaı, baqylaý isi Aqsý aýdanynyń ákimdigine júktelgen eken. Alaıda ákimdik tarapynan tıisti jumys atqarylmaǵan.
Amandyq Batalov Aqsý aýdanynyń ákimine eskertkishti 3 kúnniń ishinde qalpyna keltirýdi tapsyrdy.
Bul maqsatqa aýdandyq búdjetten 2 mln teńge bólindi.
Batalov tapsyrmasy qaı deńgeıde oryndalǵanyn Dalanews-ke oblys ákimdiginiń ókilderi aıtyp berdi:
"Kún raıyna baılanysty memorıaldyń keıbir tusyndaǵy japsyrmalar jelimnen ajyrap ketken. Ázirgi kúni jóndeý jumysy júrgizilip, eskertkish aýmaǵy tazartyldy. Eskertkish tolyqtaı qalpyna keltirildi.
Aldaǵy ýaqytta aınalasyna kóshetter otyrǵyzylady, qýrap ketken tal-terekter súrilip tastaldy. Bul jumys qazan nemese qarasha aıynda atqarylmaq", – dedi oblys ákiminiń baspasóz-hatshysy Ǵalymurat Júkel.
Budan bylaı eskertkish tolyqtaı baqylaýǵa alynady. Tóńireginde tártip pen tazalyq ornatylyp, turaqty tekserý júrgizilip turady.
Qyzylaǵashtaǵy tragedıa 43 adamnyń (onyń ishinde 8-i bala) ómirin julyp ketti. 300 adam jaraqat alsa, 1000 myńǵa tarta turǵyn qonys aýystyrýǵa májbúr boldy. Tasqyn sý 397 úıdi talqandap ketti, 146 úıge zaqym keldi.
Qazirgi tańda Qyzylaǵash aýyly tolyqtaı qalpyna kelgen. Qıraǵan úılerdiń ornyna jańa baspanalar boı kótergen.
