Qytaitaný ǵylymyn damytýdaǵy eleýli qadam
Kýrs barysynda qytaitaný kafedrasynyń belgili qytaitanýshy ǵalymdarymen qatar, Súleimenov atyndaǵy Shyǵystaný institýty sekildi ǵylymi-zertteý ortalyqtarynyń da ǵylymi qyzmetkerleri dáris oqyp, óz bilimimen, osy salada bolyp jatqan sońǵy ǵylymi jańalyqtarmen bólisti. Lektorlardyń ár sabaǵy tyńdaýshylar tarapynan úlken qyzyǵýshylyq týdyrdy, sabaq sońy suraq-jaýapqa ulasyp, diskýssiialyq ádispen jalǵasyn taýyp otyrdy. Kýrs jumysyndaǵy mundai belsendilikti usynylǵan taqyryptardyń ár alýandyǵymen, ózektiligimen túsindirýge bolady. Atap aitqanda, lektorlarymyz N. Muqamethanuly, N.Á. Aldabek, S.J. Sapanov, A. Serikqalieva, G.Ahmetbek, sondai-aq, Shyǵystaný institýtynyń ǵalymdary Oshan Janymhan, L.G.Erekeshevalar oqyǵan Qytai eliniń tarihy men mádeni qundylyqtary jaiyndaǵy, QHR qurylymdyq júiesindegi erekshelikter men qaýipsizdik qurylymdaryna qatysty, Qytaidyń syrtqy saiasaty, onyń ishinde Qazaqstan men Orta Aziia elderimen aradaǵy diplomatiialyq bailanystary jónindegi lektsiialary tyńdaýshylardyń kóńilinen shyqty. Sońǵy kezde halyqaralyq deńgeide jii aitylyp júrgen másele «Bir beldeý-bir jol» taqyryby da kýrs jumysynyń nazarynan tys qalmady. Al Qytaidyń Ýhan ýniversitetinen kelgen professor Tsao Iasiýnniń «QHR-dyń syrtqy saiasattaǵy basym baǵyttary jáne Qazaqstan men Ortalyq Aziia elderimen diplomatiialyq qatynastarynyń damýy» taqyrybyndaǵy lektsiiasy osy máselege qytai ulty ókiliniń kózqarasy men ǵylymi tujyrymy turǵysynan erekshe qyzyǵýshylyq týdyrdy.
Kýrs jumysy biyl ekinshi ret ótkizilip otyr. Osy jolǵy kýrsqa qatysýǵa niet bildirgenderdiń sanyna qarap «Qytaitaný negizderi» kýrsynyń qytaitanýshylar arasynda tanymal bola túskendigin, kótergen máseleleriniń ómirsheńdigin kórýge bolady. Osy turǵydan alǵanda, kýrs jumysy óz mindetterin tolyq oryndap, aldyna qoiǵan maqsatyna jetti dep senimmen aitýǵa bolady.
Kýrs sońynda tyńdaýshylarǵa saltanatty jaǵdaida sertifikattar tabys etildi, tyńdaýshylar óz kezeginde bir aýyzdan kýrs jumysyn uiymdastyrýshylarǵa tabys tilep, jyl saiyn dástúrli túrde óz jalǵasyn tabatynyna senim bildirdi.
Daniiar Madiev, Qytaitaný kafedrasynyń aǵa oqytýshysy.
