Mundai derekti QR Aqparat jáne qoǵamdyq damý ministri Dáýren Abaev keltirdi, – dep habarlaidy Dalanews.kz QazAqparatqa silteme jasap.
– Shynynda da, Qytaida taraǵan virýs taqyryby óte rezonansty sipatqa ie boldy. Bizdiń azamattardyń alańdaýyn túsinýge bolady. Búgin Densaýlyq saqtaý ministrligi baspasóz máslihatyn ótkizip, júrgizilgen aldyn alý sharalary týraly naqty aityldy. Shekaradaǵy baqylaý kúsheitildi. Bizdiń elshilik pen konsýldyq sondaǵy azamattarmen bailanysta. Shekaradaǵy ótkizý pýnkterinde bári de kontaktsyz termomitriiadan ótedi. Bortseriktermen, jolaýshylar poiyzynyń jolserikterimen profilaktikalyq sharalar júrgizilýde. Qytaiǵa bara jatqandar úshin arnaiy jadynama daiyndaldy, – dedi ministr «Ashyq dialog» baǵdarlamasynda.
Dáýren Abaevtyń keltirgen deregine sáikes, shekarada qazirdiń ózinde 15 myńǵa tarta azamat tekserilgen. «Aýrý belgileri ol tekserýlerde anyqtalǵan joq. Álbette, bári de jaǵdaidy baqylaýda ustap otyr» dedi Dáýren Abaev.
Eske sala ketsek, búgin Ortalyq kommýnikatsiialar ortalyǵynda ótken brifingte QR Densaýlyq saqtaý ministrligi Taýarlar men kórsetiletin qyzmetterdiń sapasy men qaýipsizdigin baqylaý komiteti tóraǵasynyń orynbasary Jandarbek Bekshin Qytaida órship jatqan koronavirýs Qazaqstan aýmaǵynda tirkelmegenin málim etken edi.
