Tiisti ministrlikter jelide taraǵan aqparatqa jaýap berdi, - dep habarlaidy Dalanews.kz.
Jelide taraǵan aqparat ne jaiynda?
Stopfake.kz málimetinshe, áleýmettik jelilerde Qazaqstan aýyl sharýashylyǵy maqsatyndaǵy aýqymdy jerlerdi Qytaiǵa berýdi josparlap otyrǵany týraly aqparat tarap jatyr.
Habarlama avtorynyń aitýynsha, bul másele boiynsha kelissózder 2009 jyldan beri júrgizilip keledi, al jalpy jerdiń aýdany 1,7 million gektarǵa jetti.
Syrtqy ister, Aýyl sharýashylyǵy ministrlikteri ne deidi?
Qazaqstan Respýblikasy Syrtqy ister ministrliginiń baspasóz qyzmeti bul aqparatqa qatysty túsinikteme berdi.
"Qazaqstannyń aýyl sharýashylyǵy maqsatyndaǵy jerlerdi Qytaiǵa berip jatqany týraly aqparat shyndyqqa janaspaidy. Bul feik. BAQ nemese aqparattyq-kommýnikatsiialyq jelilerdi paidalana otyryp, kórineý jalǵan aqparat taratqany úshin jaýapkershilik kózdelgenin eske salamyz. Tek resmi derekkózderge senińiz", – delingen QR SIM resmi habarlamasynda.
Qazaqstan Respýblikasy Aýyl sharýashylyǵy ministrliginiń baspasóz qyzmetiniń habarlaýynsha, QR Jer týraly kodeksiniń 23-babyna sáikes aýyl sharýashylyǵy óndirisin júrgizýge jáne orman ósirýge arnalǵan jerdi qospaǵanda, jer ýchaskeleri sheteldikterdiń, azamattyǵy joq adamdardyń jáne sheteldik zańdy (memlekettik emes) tulǵalardyń jeke menshiginde bolýy múmkin.
"Bul óndiristik jáne óndiristik emes, onyń ishinde turǵyn úiler men olardyń keshenderin salý úshin berilgen nemese olar salynǵan jer ýchaskeleri bolýy múmkin. Bul rette Qazaqstan Respýblikasy Memlekettik shekarasynyń shekaralyq beldeýinde ornalasqan jer ýchaskeleri jeke menshikke jáne ýaqytsha jer paidalanýǵa berilmeidi", – dep habarlady vedomstvo.
Ministrliktiń málimetinshe, QR Jer kodeksiniń 24-babyna sáikes sheteldikter, azamattyǵy joq adamdar, sheteldik zańdy tulǵalar, sheteldik qatysýy bar Qazaqstan Respýblikasynyń zańdy tulǵalary, halyqaralyq uiymdar, halyqaralyq qatysýy bar ǵylymi ortalyqtar, sondai-aq, qandastar aýyl sharýashylyǵy maqsatyndaǵy jer ýchaskelerin jeke menshik nemese jer paidalaný quqyǵymen ielene almaidy.
