ءتيىستى مينيسترلىكتەر جەلىدە تاراعان اقپاراتقا جاۋاپ بەردى، - دەپ حابارلايدى Dalanews.kz.

جەلىدە تاراعان اقپارات نە جايىندا؟

Stopfake.kz مالىمەتىنشە، الەۋمەتتىك جەلىلەردە قازاقستان اۋىل شارۋاشىلىعى ماقساتىنداعى اۋقىمدى جەرلەردى قىتايعا بەرۋدى جوسپارلاپ وتىرعانى تۋرالى اقپارات تاراپ جاتىر.

حابارلاما اۆتورىنىڭ ايتۋىنشا، بۇل ماسەلە بويىنشا كەلىسسوزدەر 2009 جىلدان بەرى جۇرگىزىلىپ كەلەدى، ال جالپى جەردىڭ اۋدانى 1،7 ميلليون گەكتارعا جەتتى.

سىرتقى ىستەر، اۋىل شارۋاشىلىعى مينيسترلىكتەرى نە دەيدى؟

قازاقستان رەسپۋبليكاسى سىرتقى ىستەر مينيسترلىگىنىڭ باسپا ءسوز قىزمەتى بۇل اقپاراتقا قاتىستى تۇسىنىكتەمە بەردى.

"قازاقستاننىڭ اۋىل شارۋاشىلىعى ماقساتىنداعى جەرلەردى قىتايعا بەرىپ جاتقانى تۋرالى اقپارات شىندىققا جاناسپايدى. بۇل فەيك. ب ا ق نەمەسە اقپاراتتىق-كوممۋنيكاسيالىق جەلىلەردى پايدالانا وتىرىپ، كورىنەۋ جالعان اقپارات تاراتقانى ءۇشىن جاۋاپكەرشىلىك كوزدەلگەنىن ەسكە سالامىز. تەك رەسمي دەرەككوزدەرگە سەنىڭىز"، – دەلىنگەن ق ر ءسىم رەسمي حابارلاماسىندا.

قازاقستان رەسپۋبليكاسى اۋىل شارۋاشىلىعى مينيسترلىگىنىڭ باسپا ءسوز قىزمەتىنىڭ حابارلاۋىنشا، ق ر جەر تۋرالى كودەكسىنىڭ 23-بابىنا سايكەس اۋىل شارۋاشىلىعى ءوندiرiسiن جۇرگiزۋگە جانە ورمان ءوسiرۋگە ارنالعان جەردi قوسپاعاندا، جەر ۋچاسكەلەرi شەتەلدىكتەردىڭ، ازاماتتىعى جوق ادامداردىڭ جانە شەتەلدiك زاڭدى (مەملەكەتتiك ەمەس) تۇلعالاردىڭ جەكە مەنشiگiندە بولۋى مۇمكiن.

"بۇل ءوندiرiستiك جانە ءوندiرiستiك ەمەس، ونىڭ iشiندە تۇرعىن ۇيلەر مەن ولاردىڭ كەشەندەرiن سالۋ ءۇشiن بەرiلگەن نەمەسە ولار سالىنعان جەر ۋچاسكەلەرi بولۋى مۇمكiن. بۇل رەتتە قازاقستان رەسپۋبليكاسى مەملەكەتتىك شەكاراسىنىڭ شەكارالىق بەلدەۋىندە ورنالاسقان جەر ۋچاسكەلەرى جەكە مەنشىككە جانە ۋاقىتشا جەر پايدالانۋعا بەرىلمەيدى"، – دەپ حابارلادى ۆەدومستۆو.

مينيسترلىكتىڭ مالىمەتىنشە، ق ر جەر كودەكسىنىڭ 24-بابىنا سايكەس شەتەلدىكتەر، ازاماتتىعى جوق ادامدار، شەتەلدىك زاڭدى تۇلعالار، شەتەلدىك قاتىسۋى بار قازاقستان رەسپۋبليكاسىنىڭ زاڭدى تۇلعالارى، حالىقارالىق ۇيىمدار، حالىقارالىق قاتىسۋى بار عىلىمي ورتالىقتار، سونداي-اق، قانداستار اۋىل شارۋاشىلىعى ماقساتىنداعى جەر ۋچاسكەلەرىن جەكە مەنشىك نەمەسە جەر پايدالانۋ قۇقىعىمەن يەلەنە المايدى.