Qazaqstannan kelgen Aisultan Ýhan qalasynyń ýniversitetinde bilim alady. Qala karantinge jabylǵaly osyndaǵy qazaq jastary saqtyq sharalaryn qabyldaýǵa májbúr bolǵan.
"Búgin Qytai telearnalary jaǵdaidy baqylaýǵa aldyq dep habar taratty. Alaida keshe keshkisin qaladaǵy áýejai jabylyp qaldy. Ázir qalaǵa kirý de, shyǵý da múmkin emes. Biz karantin aýmaǵyndamyz.
Metro, qoǵamdyq kóliktiń jumysy toqtady, tek taksi qatynap tur. Biraq onyń ózi azdyq etýde. Qala karantinge jabylmai tura bizben birge bolǵan birshama adam kólikpen kórshi qalaǵa jetip, ári qarai Beijińge attandy. Osy aradan týǵan jerine týra tartady. Alaida dál qazir qaladan shyǵý múmkin emes", – deidi Aisultan.
Onyń aitýynsha aýrýdyń asqynýyna qaýipti indetpen tuspa-tus kelgen Qytai jańa jyly da sebepshi bolýy múmkin. Sebebi bul ýaqytta qytailyqtar bir-birin quttyqtap, alys-jaqyndaǵy týys-týǵandaryna saparlap keledi.
Qytailyqtar jumysqa aldaǵy aidyń 6-sy kúni shyǵady. Eldegi birqatar oqý oryndary virýsqa bailanysty demalysty naýryz aiyna deiin sozǵan.
Virýs juqtarǵandardyń sany resmi málimetke qaraǵanda áldeqaida kóp degen qańqý sózdi Ýhan qalasyndaǵy qazaq stýdentteri de estipti.
"Qalada qamalyp qalǵan stýdentter jataqhanada bas qosyp, karantinniń aldynda qajetti azyq-túlikpen qamdanyp aldyq. Qytai biligi jaǵdaidy baqylaýda ustaitynyn aitty. Janymyzda sheteldik stýdentterdi baqylaityn bólim jetekshisi bar.
Ýniverlerdiń kópshiligi karantin bastalmai turyp óz stýdentterin elderine attandyryp úlgerdi. Dárigerler bizge arnaiy videolar jiberip, qaýipti indettiń qalai taralatyny týraly málimet berdi. Maska úlestirdi.
Virýs juqtyrǵan jaǵdaida qaida habarlasý keregin aitty. Keibir oqý oryndarynyń basshylyǵy stýdentterge arnap azyq-túlik jetkizip berdi. Ázirge shydaýǵa bolady", – deidi Aisultan.
Ýhan qalasynda bilim alatyn taǵy bir qazaq stýdenti Arýjan Begmanova kerisinshe mundaǵy ahýaldyń ýshyǵyp turǵanyn habarlady.
Arýjan Qazaqstan biligi karantin aimaǵynda qalǵan stýdentterdi elge qaitarýy tiis dep esepteidi.
"Qaladaǵy dúken-dúńgirshekterdiń derligi jabylyp qaldy. Adamdar azyq-túlikti talap alyp ketti. Ýhandaǵy jaǵdai ýshyǵyp tur. Tumannan túk kórinbeidi. Úiimdi saǵyndym. Otbasym kútip otyr. Men sekildi júzdegen jastar eline qaitqysy keledi. Úkimettiń buǵan qaýqary jeter, Qazaqstanǵa qaitqymyz keledi", – dep jazǵan Arýjan Insta paraqshasynda.
Ol osyndaǵy qazaq stýdentteriniń aman-saý ekenin, syrqatqa shaldyqpaǵanyn aitqan.
"Buǵan kóz jetkizgisi kelse bizderdi teksersin, aýrý anyqtalmasa elimizge jibersin", – deidi Arýjan.
