Óńir basshysy Janseiit Túimebaevtyń aityp ótkenindei óńirdiń ekonomikalyq áleýetin arttyrǵysy keletin investorlarǵa barynsha jaǵdai jasalady.
«Ózderińiz biletindei, Qazaqstan men Qytai arasynda strategiialyq bailanys ornaǵan. Nátijesinde eki el arasyndaǵy taýar ainalym 10,4 mlrd. AQSh dollaryn qurady. Bir ǵana bizdiń oblystyń ózinde qytailyq kompaniialardyń qatysýymen 5 birdei joba júzege asyp otyr. Bolashaqta ózderińizben diplomatiialyq qarym - qatynasty nyǵaita otyryp, investitsiialyq jobalardy júzege asyramyz degen oidamyz», – deidi Janseiit Qanseiituly.
Al qytailyq kompaniialar oblysta qorǵasyn jáne myrysh qaldyqtaryn qaita óńdeitin zaýyt salýǵa nietti. Jalpy quny 4,8 mlrd. teńgeni quraityn joba jylyna 300 myń tonna qaldyqty óńdeýge qaýqarly. Zaýyt iske qosylsa, 100-den astam jańa jumys orny ashylatyn bolady.
Budan bólek óńir basshysy qytailyqtardy eki jaqty memorandým túzýge shaqyrǵan bolatyn. Osynyń negizinde qazirgi tańda Túrkistanda óndiriletin aýyl sharýashylyq ónimderin Qytaiǵa eksporttaý máselesi talqylanýda. Janseiit Túimebaev qytailyq investorlarǵa elektr qýatymen júretin kólik shyǵaratyn zaýytty Túrkistannan salýdy usynǵan edi. Qonaqtar bul usynystarǵa qyzyǵýshylyq tanytyp, atalǵan jobalardy birge júzege asyrýǵa daiyn ekenin aitty.
