«Qytai Maianmý, Tailand, Singapýr, Indoneziia, Pákistan, Shri-Lanka, Birikken Arab Ámirligi, Keniia, Seishely, Tanzaniia, Angola jáne Tájikstannan jańadan áskeri-logistikalyq nysandaryn ornalastyrýdy qarastyryp jatyr» delingen 200 bettik qujatta.
Qazir Tájikstanda Reseidiń áskeri bazasy bar, onda 7 myń sarbaz qyzmet etedi.
Amerikalyq sarapshylardyń esebi boiynsha, Beijińniń maqsaty Qytai yqpaldy álemdik derjavaly el bolýǵa umtylyp, Qurama Shtattarmen básekeles bolǵysy keledi.
Baiandamada Beijińniń aldaǵy on jyl ishinde iadrolyq qarýdy eki esege kúsheitýge nietti ekeni aitylǵan. Biraq Qytaidyń syrtqy ister ministrligi Pentagonnyń bul baiandamasyn teriske shyǵaryp otyr.
Byltyr aqpan aiynda Washington Post gazeti Tájikstannyń Taýly-Badahshan avtonomdy oblysyndaǵy jergilikti turǵyndardyń sózderine silteme jasap, Qytaimen shekaralas aimaqta Beijińniń úsh birdei qupiia áskeri bazasy bar ekenin jazǵan. XIX ǵasyrda bul aýdandy Resei imperiiasynyń kazak áskerleri kúzetetin.
«Spýtnik arqyly túsirilgen videodan bul mańaidan eki ǵimaratty kórýge bolady. Bul keshen Aýǵanstanmen shekaralas mańda ornalasqan. Ondaǵy ásker Aýǵanstannan Tájikstanǵa baratyn úlken tas joldy kúzetedi» delingen maqalada.
Washington Post jýrnalisi Mýrgab bazarynda áskeri formada júrgen qytai sarbazyn sýretke túsirip alǵan.
Alaida Taýly-Badahshan avtonomdy oblysynyń tóraǵasy Iodgor Faizov bul óńirde Qytaidyń áskeri bazasy bar degen aqparatty teriske shyǵardy. Onda tek shekara beketi bar ekenin aitqan.
Aýǵanstannyń Tájikstanmen, Qytaimen jáne Pákistanmen shektesetin taýly Vahan dálizinde 2012 jyldan beri Qytaidyń qarýly politsiiasy bar.
2018 jyldyń jazynda Qytai aýǵannyń Badahshan aýmaǵynan terrorizmmen kúres maqsatynda oqý-jattyǵý lagerin qurǵan. Bul málimetti South China Morning Post gazeti derekkózine silteme jasap habarlaǵan bolatyn. Biraq bul aqparatty Kabýl rastamaǵan.
Sarapshylar pikirinshe, Beijiń Shyǵys Túrkistan islam qozǵalysy ǵana emes, «Islam memleketi» terroristik uiymy Qytaidyń batysyndaǵy Shyńjań uiǵyr aýdanyna yqpal etýi múmkin dep qaýiptenedi.
