Qazaqstan syrtqy ister ministrliginiń resmi ókili Aibek Smadiiarov "Qytai politsiiasy Qazaqstan azamatyn ustap otyr" dep BAQ-qa taraǵan aqparatqa bailanysty mán-jaidy túsindirdi, dep habarlaidy Dalanews.kz tilshisi Ulysmedia.kz saityna silteme jasap.
Eske sala keteiik, buǵan deiin BAQ-ta Qytaidaǵy týystaryna qydyryp barǵan Qazaqstan azamaty Tursynáli Bekdáýlet "Qytai politsiiasy qujatymdy taryp alyp, bermei otyr" dep málimdegenin jazǵan edi. Ol Qazaqstannyń syrtqy ister ministrliginen kómek suraǵan.
Tursynáliniń sózinshe, politsiia ony tergeý bólimshesine aparǵan. Biraq ne úshin ustaǵanyn túsindirmegen.
– Ol aqparatty bilem. Bir qyzyǵy, ol kisi Qazaqstan azamattyǵyn alǵan. Biraq birneshe jyl buryn Qytai azamaty bolǵan kezde jol-kólik apatyna túsken. Biraq basqa tarappen problemasyn sheshpei Qazaqstanǵa ketip qalǵan. Osy joly barǵanda jergilikti politsiia oǵan “osy máseleńdi shesh, sodan keiin ary qarai júre berseń bolady” degen. Biraq bizdiń keibir jýrnalister bul máseleni eki el arasyndaǵy vizasyz rejim túkke de turmaidy, mine bizdiń azamattardy ustap jatyr” dep baibalam salyp maqala shyǵara bastady. Eshqandai da problema joq. Ol kisi óz problemasyn sheship, daýlasqan basqa tarappen máseleni rettegennen keiin pasportyn alǵannan keiin júre bergen. Birde-bir kún qamaýǵa alynǵan da, oǵan kúsh jumsalǵan da joq. Qazir ol Qazaqstanǵa qaityp keldi, – dedi Aibek Smadiiarov SIM-de búgin ótken brifing barysynda.
Aibek Smadiiarov buryn Qytai azamaty bolǵan qazaqstandyqtardyń kórshi elge vizasyz rejimmen barardyń aldynda qandai máselelerdi eskerý kerektigin aitty
– Eger Qytai azamaty bolǵan kezde quqyq buzý áreketińiz tirkelgen bolsa, sony sheshýge tyrysyńyzdar. Basqa aitar eshqandai keńes joq, – dedi SIM resmi ókili.
Aibek Smadiiarov ondai málimetterdi Qytai elshiliginen bilýge bolatynyn aitady.
– Ol málimetterdi sol jaqtaǵy týysqandary arqyly bilýge bolady. Al biz arqyly bile almaidy. Nemese Qytai elshiligine habarlassyn. «Meniń Qazaqstan azamaty retinde Qytai aýmaǵyna kirýge ruqsatym bar ma? Kedergi bar ma?» - dep anyqtap bilse, bolady. Áitpese barǵannan keiin ǵana biledi, – dedi ol.
