Qazaqstan syrtqy ister ministrligi (SIM) koronavirýstyń oshaǵy Qytaidyń Ýhan qalasynan azamattaryn alyp ketý máselesin qarastyryp jatyr. Biraq qytai biligi ruqsat etpei jatyr dep málimdedi SIM ókili Aibek Smadiiarov.
"Qytaidaǵy diplomattarymyz qazaqstandyqtardy evakýatsiialaý jolyn qarastyryp jatyr. Karantin jariialanǵan alǵashqy kúni resmi hat joldadyq. Qytai biligi áli birde-bir memleketke ruqsat bermedi", – dedi Smadiiarov. Onyń sózinshe, "qytai biligi Ýhan qalasyn jaýyp tastaǵan, eshkimdi shyǵarmaidy".
Ýhanda 230 qazaq stýdenti bar. Endi stýdentterdiń qashan oralatyny belgisiz.
Japoniia men AQSh biligi azamattaryn evakýatsiialaý jóninde málimdeme jasady.
Ýhanda Qyrǵyzstannyń 15 azamaty bar. Olardyń 14-i stýdent. Bul qalada Tájikstannan da ondaǵan stýdent oqidy. Birneshe ózbekstandyq otanyna oralyp úlgerdi.
Qazaqstannyń bas sanitar dárigeri Jandarbek Bekshin Qytaidaǵy stýdentterge tek SIM arqyly ǵana kómektese alamyz degen.
Sońǵy málimet boiynsha, 2019-nCoV koronavirýsymen aýyrǵandar sany 2,8 myń adamǵa jetken. 81 adam kóz jumǵan. Aýstraliia, Vetnam, Malaiziia, Nepal, Koreia, Singapýr, AQSh, Tailand, Frantsiia jáne Japoniiada virýsty juqtyrǵandar anyqtaldy. Dúniejúzilik densaýlyq saqtaý uiymy virýstyń taralýyn ulttyq tótenshe jaǵdai dep moiyndady, halyqaralyq dep ázirge jariialai qoimady.
